Nú-Iorktiń Brýklın federaldyq soty Qazaqstan azamaty, Nú-Iorkte turatyn Ahror Saıdahmetovti  DAISH ekstremıstik uıymyna materıaldyq kómek kórsetpek bolyp, astyrtyn sóz baılasty dep aıyptap, 15 jylǵa sottady dep habarlaıdy Qamshy.kz aqparat agenttigi Azattyqqa silteme jasap.

AQSH ádilet mınıstrliginiń habarlaýynsha, Saıdahmetovke úkim 20 jeltoqsanda shyqqan.

«Ahror Saıdahmetov DAISH atynan jıhadqa qatysýǵa Sırıaǵa barmaq bolǵany, Sırıaǵa jete almaǵan jaǵdaıda AQSH-ta quqyq qorǵaý qyzmetkerlerin óltirýdi maqsat etkeni úshin jaýapqa tartylyp otyr» dep málimdedi Nú-Iorktiń Shyǵys okrýginiń prokýrory mindetin atqarýshy Brıjıt M.Rode sot prosesinde.

21 jastaǵy Ahror Saıdahmetov 2015 jyly aqpanda Nú-Iork áýejaıynda ustalǵan. AQSH bıliginiń málimetinshe, Saıdahmetov Túrkıaǵa baratyn reıske otyryp, odan ary Sırıaǵa ketpek bolǵan.

AQSH ádilet mınıstrligi bıyl 19 qańtarda Saıdahmetov aıybyn moıyndaǵanyn málimdegen.

AQSH-ta bul is boıynsha Ózbekstannyń úsh azamaty sottalyp jatyr. AQSH bıligi olarǵa AQSH turǵyndaryn DAISH-qa qosý maqsatymen Sırıaǵa jóneltpek bolyp aqsha jınaǵan degen aıyp taqqan.

Ádilet mınıstrligi Ahror Saıdahmetov jazasyn ótegen soń AQSH-tan shyǵarylatynyn aıtady.