Almatyda JOO muǵalimderiniń bastamasymen qala ýnıversıtetteriniń Alánsy quryldy. Aláns quramyna ońtústik astanadaǵy barlyq 38 ýnıversıtetteri kirdi. Alánstyń negizgi maqsaty – «Rýhanı jańǵyrý» baǵdarlamasyn iske asyrýda joǵary oqý oryndarynyń oqytýshylary men sarapshylarynyń áleýetin tartýǵa múmkindik beredi.
- «Ýnıversıtetterdiń mısıasy - qoǵamymyzdyń rýhanı jańarýynyń mańyzdy komponenti bolyp tabylady. Ol tek bilikti kadrlardy ǵana emes, sonymen qatar eldiń azamattaryn qalyptastyrady. Sanany jańǵyrtýdyń negizgi quraly - básekege qabilettilik, ashyqtyq, pragmatızm, ulttyq kodty saqtaý prınsıptary bar patrıottyqty qalyptastyrady. Osy Alánsty qurýǵa bizder uzaq daıyndaldyq. «Rýhanı jańǵyrý» baǵdarlamasyn júzege asyrýdaǵy joǵary oqý oryndary muǵalimderiniń orny erekshe. Al sizder bilesizder, qalada shamamen 15 myń muǵalim bar. Bizde naqty josparlar bar. Aláns «Rýhanı jańǵyrý» strategıasyn qoldaýǵa baǵyttalǵan, qalamyzdyń barlyq muǵalimderiniń tájirıbe almasýyna kómektesetin jańa shyǵarmashylyq alańǵa aınalady jáne ýnıversıtetterdiń rýhanı jańǵyrýdaǵy draıveri bolýyna yqpal etedi», - dedi Ál-Farabı atyndaǵy Qazaq Ulttyq ýnıversıtetiniń prorektory Sholpan Jamanbalaeva.
Ýnıversıtetter Alánsy muǵalimderdiń birinshi qalalyq forýmyn, qasıetti oryndar týraly ǵylymı konferensıa, qazaqstandyq mádenıetti tanymal etý úshin ınternet-jobalardy jáne t.b. is-sharalar ótkizýdi josparlap otyr.
«Búgin qalanyń barlyq ýnıversıtetterinde «Rýhanı jańǵyrý» boıynsha jumystar júrgizip keledi. Árbir ýnıversıtette ózderiniń jobalary bar. Endi mine Aláns arqyly biz kúsh-jigerimizdi biriktirip, jalpyqalalyq jobalardy júzege asyrýdy kózdep otyrmyz. Máselen, Aláns aıasynda oqytýshylardan, jas ǵalymdardan, doktoranttar men
magıstranttardan jınalǵan túrli baǵyttaǵy turaqty sarapshylar klýby qurylatyn bolady», - deıdi Abaı atyndaǵy Qazah Ulttyq pedagogıkalyq ýnıversıtetiniń prorektory Janatbek Shpekbaev.
Memleket basshysynyń maqalasynda anyqtalǵan qundylyqtardy stýdent jastar arasynda nasıhattaýdy Aláns basty mindetteriniń biri etip qoıyp otyr. Eń birinshi bilimge tabyný, básekege qabilettilik, pragmatızm, sananyń ashyqtyǵy jáne basqa da qundylyqtar.
«El basy bizge naqty mindetter júktedi. Biz árıne daıynbyz. Ótken jyly árbir ýnıversıtet óz sharasyn jeke uıymdastyrdy. Búgin biz birigip, úlken kúshke aınalyp otyrmyz. Árbir muǵalim artynda júzdegen, myńdaǵan stýdentter bar. Ýnıversıtetter Alánsy shyn máninde «Rýhanı jańǵyrý» baǵdarlamasyn júzege asyrýda shyǵarmashylyq, ashyq, tanymdyq jáne jańashyl alańyna aınalatynyna senimdimiz», - dedi UIB ýnıversıtetiniń prorektory Qaıyrjan Meńdiǵalıev.
Sonymen qatar, uıymdastyrýshylar Alánstyń ataýy týraly óz pikirlerin bildirdi.
«Ózderińizge belgili Almatyda búgingi kúni 38 ýnıversıtet bar. Bizder osy bir shańyraq astyna birigip, Alánsty «University 38» ataýdy jón kórdik», - dedi Abylaı han atyndaǵy Qazaq halyqaralyq qatynas jáne álem tilderi ýnıversıtetiniń prorektory Tatána Serejkına.
