Sahnanyń sánine aınalǵan tanymal tulǵalardyń arasynda kópbalaly ata-ana barshylyq. Shúkir deımiz. Olardy úlgi tutatyn jastar da jeterlik. Qamshy.kz aqparat agenttigi halyq sanyn arttyrýǵa úles qosyp júrgen juldyzdy otbasylardy nazarlaryńyzǵa usynady.

Ánshi, prodúser Qydyráli Bolmanov pen onyń tanymal jary Qaraqat Ábildına juldyzdy shańyraqtarynda 5 bala tárbıelep otyr. Byltyr Qaraqat tórt uldan soń ózine tartqan qaraqat kózdi Aıala esimdi qyzdy dúnıege ákeldi. Kópten kútken hanshaıymdy Qydyráli Bolmanov perzenthanadan sán-saltanatpen shyǵaryp aldy.

Al ótkir ázilderimen qoǵamdaǵy shyndyqty aıtýdan sharshamaıtyn Tursynbek Qabatovqa jary Móldir úsh qyzdan keıin bir ul syılady. Otbasydaǵy ekinshi bala Aıym Tursynbekqyzy EKSPO-2017 halyqaralyq kórmesiniń jabylý saltanatynda Elbasy Nursultan Ábishulymen birge kópshilik aldyna shyqqan bolatyn.

«Sen syıǵa tartqan oramal» dep án salatyn aq oramaldy Roza Álqoja kópbalaly analardyń kóshin bastap tur. «Óleńinen ajyramas áıelmin, Balasynyń butyn jýyp jatyp ta», - dep jyrlaıtyn aqyn ári ánshi – bes balanyń anasy, óner men otbasy tizginin teń ustaǵan adam. Otaǵasy – jýrnalıs Aıdyn Qaba. Ol ekeýi úsh ul, eki qyz tárbıelep otyr.

Kórermendi kúlkige qaryq qylatyn «Aldaraspan» ázil-syqaq teatrynyń aktery, Túrkistan qalasynyń qurmetti azamaty Nurjan Tólendıev – alty balanyń ákesi. Nurjannyń úlken uly Raýan Temirhan búginde ákesimen birge sahnaǵa shyǵyp júr.

Ánshi Qaırat Nurtas pen aktrısa Juldyz Ábdikárimovanyń otbasynda eki ul, eki qyz bar. «Arman. Kogda vse angely spát» fılminde juldyzdy jup basty rólderdi somdaǵan. Jaryn 10 jyldan keıin halyqqa tanystyrǵan ánshi «balalarymdy kórý úshin taǵy 10 jyl kútińizder», - dep ázildep qoıady.

Al otandyq án baıqaýlary arqyly dúıim jurtqa tanylǵan Dınara Sultan – úsh qyz ben bir uldyń anasy. Jelige sulý qyzdary men súıkimdi ulynyń sýretin júkteýden esh jalyqpaıtyn ánshi joldasynyń jumys babyna baılanysty bes jyl Dýbaıda turǵan. Jat elde júrip týǵan jerin saǵynǵan ánshi shyǵarmashylyqqa bilek sybanyp kirisetini anyq.

QR eńbek sińirgen qaıratkeri, «Daryn» memlekettik syılyǵynyń laýreaty, Tóle bı aýdanynyń qurmetti azamaty, ánshi Altynaı Jorabaeva halyqqa ónerimen ǵana emes, ómirimen de tanylǵan juldyzdardyń tiziminde. Kópbalaly ana búginde tórt qyz tárbıelep otyr. Astananyń 20 jyldyq mereıtoıyna arnalǵan konsertte Elbasy Nursultan Nazarbaev ánshiniń qolyn alyp, tilegin aıtqan bolatyn.  

Ánshi Indıra Rasylhan da áriptesterinen qalysqan joq. Tórt balanyń anasy ónerde óz ornyn tapqan. Aıdına, Darına esimdi egiz qyzdary men Aslan atty uly eseıip qalǵan. Sút kenjesi Raıana bıyl 5 jasta.

Ózgeniń ómirin talqylaýdan aýlaqpyz. Tek úlgi bolarlyq tustaryn ashyp aıtqandy jón sanadyq!