AQSH generaly Pol Selva AQSH-tyń  Reseımen jáne Qytaımen bolýy múmkin soǵystyń senarıin atady, dep jazady Qamshy.kz aqparat agenttigi.

Jaqynda AQSH, Reseı jáne Qytaı arasyndaǵy básekeni moıyndaıtyn strategıa halyqaralyq qatynastarda ústemdik etedi. Sol sebepti Pentagon Máskeýmen jáne Beıjińmen bolýy múmkin janjaldyń senarıin qurastyryp jatyr.

«Sońǵy on jylda álem jurtshylyǵy Qytaıdyń dúnıe júzine, al Reseıdiń Azıa men Eýropaǵa tıgizip jatqan yqpalyn baqylaýmen keledi. AQSH eki elmen de qaqtyǵysqa túsken», - dedi Pol Selva.

Onyń aıtýynsha, eger bul memleketter arasynda eshqandaı janjal bolmasa, álemdi «qalypty saýda» bıleıtin edi, alaıda qazir jaǵdaı ýshyǵyp tur. General 2018 jyly Reseıdiń Grýzıadan eki aımaqty tartyp alǵanyn, 2014 jyly Qyrymdy aneksıalaǵanyn jáne Sırıa prezıdenti Bashar Asad rejımin qoldaýdy jalǵastyryp kele jatqanyn eske saldy.

Al Qytaı Ońtústik Qytaı teńizinde jasandy aral salyp, terıtorıalyq talabyn kúsheıtip otyr.

«Reseı, Qytaı jáne AQSH arasynda buǵan deıin de qaqtyǵys bolǵan, áli jalǵasatyny anyq. Uly derjavalardyń bul kıkiljińi álem ekonomıkasyndaǵy birinshilik úshin talastan týǵan», - dedi Selva.

AQSH generalynyń pikirinshe, uly derjavalardyń kúresi áli birtalaı jylǵa sozylýy ǵajap emes. Ol AQSH pen Reseı soǵysqan jaǵdaıda eki jaq ta barlyq kúshin jumyldyratynyn aıtty.

«Reseımen jerde de, áýede de soǵysýymyz múmkin. Alaıda áskerı-teńiz kúshteri mańyzdy ról oınaıdy. Sebebi Reseı men Eýropaǵa úlken kúshterdi tek Soltústik Atlant aǵysy arqyly ǵana jiberýge bolady. Alaıda shaıqastyń kóbi jer betinde júredi», - dep túsindirdi general soǵys senarıin.

Birneshe kún buryn Pentagon qabyldaǵan strategıaǵa sáıkes, AQSH Qytaı men Reseıdi basty qarsylastary dep tanyǵan, tek eki elmen bir ýaqytta soǵys júrgizýge eldiń resýrs qory jetpeıdi.

Byltyr tamyz aıynda amerıkalyq National Interest jýrnaly derjavalar arasyndaǵy jahandyq qaqtyǵystyń taǵy bir nusqasyn keltirgen. Basylym  Reseımen jáne Qytaımen soǵyssa, AQSH-tyń túbi jeńiske jetetinin jazǵan. Kem degende, jeńiske bir taban jaqyndaıdy.

«Bul fakt Reseı men Qytaıdyń saıası oıyndarǵa degen qumarlyǵyn tizgindeıdi. Amerıkanyń áskerı qýaty orasan jáne ol tarıhtaǵy eń myqty áskerı odaqty basqaryp otyr. Máskeý men Beıjińniń qolynan keletini – usa-túıek másele týdyrý ǵana, Amerıka ol qıyndyqtardy azǵantaı aktıv bólip sheshe salady», - delingen amerıkalyq basylym taratqan aqparatta.