Muhtar Áýezov atyndaǵy Qazaq memlekettik akademıalyq teatrynyń eks-dırektory Erlan Bilál sottan ataq pen marapattaryn tartyp almaýdy surady, dep habarlaıdy Qamshy.kz aqparat agenttigi Today.kz saıtynyń deregine súıenip.
«Qurmetti sot, dál qazir jaǵdaıym qıyn, bári biledi, óte ókinemin. Meniń densaýlyǵymdy, otbasylyq jaǵdaıymdy, qarjylyq kúıimdi nazarǵa alýyńyzdy ótinemin. Aıyppuldyń kólemin azaıtýyńyzdy suraımyn. Bul jazany óteý qıyn. Men jazany aıyppul týraly óteýge álbette kelisemin, biraq adal eńbegimmen alǵan marapattarymnan aıyrmaýyńyzdy suraǵym keledi. Jastar Odaǵy syılyǵynyń laýreaty marapatyn 2003 jyly anam qaıtys bolǵan soń aldym. Bul teatr sahnasynda shyǵarmashylyqpen aınalysýyma, ári qaraı ómir súrýimen úmittiń belgisindeı bolǵan edi. Ári qaraı júretin kúsh taptym. Úsh jyl boıy óz-ózime kele almadym. (...) Qazaqstan Respýblıkasynyń eńbek sińirgen qaıratkeri ataǵyn ákem qaıtys bolǵan soń aldym. 25 jyl boıy dıagnozyma qaramastan teatrda jumys istedim», - dedi Erlan Bilál.
Teatrdyń burynǵy basshysy istegen isine ókinetinin birneshe ret aıtty.
«Shyǵarmashylyq adam retinde ólip qalmasyn deseńiz, marapatymdy tartyp ala górmeńiz. Qant dıabeti men arterıaldyq qysym - adymymdy keń ashýyma múmkindik bermeıtin aýyr aýrýlar. Óte ókinemin, men jaza bastym. Sizden ótinemin, qurmetti sot, meniń kúıimdi túsinýińizdi ótinemin. Bárimiz de pendemiz. Kúnderdiń bir kúninde bárimiz de qatelesýimiz múmkin», - dedi Erlan Bilál.
Erlan Bilál sottaǵy sońǵy sózin aıtyp turyp jylap jiberdi.
«Obektıvti bolýyńyzdy ótinip suraımyn. Men óz kinámdi moıyndaımyn. Men qatelestim. Eger zań ruqsat berse, balalarym úshin meni qoldasańyz, elimizdiń gúldenýi úshin qaıtadan barymdy salyp eńbek etetin bolamyn, stýdentterge sabaq beremin. Ant etemin!», - dedi Erlan Bilál.
Esterińizge salsaq, Erlan Bilál 5 qańtarda ustalǵan edi. 8 qańtarda zıaly qaýym ókilderi Erlan Biláldi qorǵap, sóz sóıledi. 16 qańtarda akterdiń 1 205 000 teńge kóleminde kepilge aqsha tólegeni belgili boldy. 25 qańtarda Almatydaǵy Almaly aýdandyq sotynda Erlan Biláldiń soty bastaldy.
Erlan Bilál óz kinásin tolyq moıyndap, istegen isine ókinetinin aıtty.
