Búgin Qazaqstandaǵy adam quqyǵy jónindegi búronyń pres-zalynda abaqtydaǵy saıası tutqyn Maks Boqaevtyń densaýlyǵy men oǵan qatysty oryn alǵan zańsyzdyqtarǵa oraı baspasóz májilisi ótti dep habarlaıdy Qamshy.kz aqparat agenttigi bureau.kz saıtynyń deregine súıenip. Onyń qorǵaýshysynyń aıtýynsha, qazir M.Boqaev jarty jylǵa qatań rejımge aýystyrylǵan. Onymen qosa, óz turǵylyqty óńirine aýystyrý týraly shaǵymyn sot taǵy da qanaǵattandyrmaı tastady.

Maks Boqaevqa qatysty sońǵy zańsyzdyqtar týraly baspasóz májilisi spıkerleri onyń qorǵaýshysy Aıman Omarova, búro jetekshisi Evgenıı Jovtıs jáne «Aman-saýlyq» qoǵamdyq qorynyń jetekshisi, dáriger Baqyt Túmenova aıtyp berdi.

Qorǵaýshysynyń aıtýynsha, túrme basshylyǵy Maks Boqaevtyń jattyǵý jasaýdan bas tarqanyn jeleý etip, ony qatań rejımge aýystyrǵan. Al negizinde, óziniń densaýlyq jaǵdaıyna baılanysty Maks Boqaevqa sýyqqa shyǵýǵa dárigerler tyıym salǵan. Advokat A.Omarova Boqaev jattyǵýdy jasaýdan bas tarpaǵan, tek 25 gradýstyq sýyqta densaýlyǵyna baılanysty dalada jasaýdan bas tarqan. Óz kamerasynda jasaǵan. Biraq, saıası tutqynnyń densaýlyq jaǵdaıy qaperge alynbastan ol qatań rejımge aýystyrylǵan.

Qorǵaýshynyń aıtýynsha, bul ádeıi jasalyp otyrǵan quıtyrqy is. Sebebi, ondaı jaǵdaı barlyq saıası tutqyndarǵa paıdalanylady. Ár-túrli syltaýmen tártipti buzdy degen eskertýlerdi kóbeıtip, Maks Boqaevty budan da qatań rejımdi túrmege aýystyrý jospary bar ma dep boljaıdy.

Al aıazda jattyǵý jasaý rejımin Evgenıı Jovtıs halyqaralyq zań normalaryna qarsy dep ata ótti. Onyń aıtýynsha, adamdy bostandyǵynan aıyrýdyń ózi jaza, al onymen qosa ony óz erkinen tys qandaı da iske májbúrleý, qorlaýǵa teń. Sondyqtan, ol jattyǵýlardyń densaýlyq pen psıhologıalyq jaǵdaıǵa tek keri áseri bolaryn aıtty.

«Jattyǵýǵa, qandaı da fızıkalyq iske áskerdi mindetteýge bolady. Sebebi, áskerge ádette 27 jasqa deıingi, tıisti medısınalyq tekserýden ótken, jaramdy degen azamattar barady. Al túrmege túsken adamnyń barlyǵynyń densaýlyǵy ondaı májbúrli jattyǵýǵa jaramdy degen sóz emes. Sondyqtan, bul esh zańdylyqqa jatpaıdy», - deıdi Evgenıı Jovtıs.

«Aman-saýlyq» qoǵamdyq qorynyń jetekshisi jýyrda Maks Boqaevtyń týystarynyń kelgenin, onyń barlyq tekserýleriniń qorytyndysy qolynda ekenin aıtyp, 25 gradýstyq aıazda jattyǵý jasaýǵa bolmaıtynyn, densaýlyǵy ýshyǵyp ketýi múmkin ekenin jetkizdi.

«Maks Boqaevta eki birdeı sozylmaly aýrý bar – osteohandroz  jáne gepatıt S. Ondaı dıagnozdarmen arnaıy taǵam rejımi jáne saýlyq gımnastıkasy jasalýy tıis. Biraq, túrme jaǵdaıynda ol árıne múmkin emes. Sondyqtan, eń bolmasa 25 gradýs aıazda jattyǵý jasaýǵa májbúrlemeı, ony jaıyna qaldyrsa deımin. Sebebi, M.Boqaevqa sýyqtaýǵa bolmaıdy», - deıdi Túmenova.

Quqyqqorǵaýshy Evgenıı Jovtıs Maks Boqaevtyń qatardaǵy tutqyn emes, saıası tutqyn ekenin eske salyp, endigi maqsat oǵan qatysty bolǵan barlyq zańsyz isterge qarsy shaǵym jazyp, ony qatań rejımnen shyǵarý ekenin aıtty. Sonymen qatar, Maks Boqaev pen Talǵat Aıanǵa qatysty sot sheshiminiń saıası negizi bar, zańsyz ekenin barlyq halyqaralyq quqyqqorǵaý uıymdary Qazaqstan bıligine eskertkenin, olardy bosatýdy talap etkenin eske salyp, saıası tutqyndardyń bostandyǵy úshin kúres jalǵasatynyn aıtty.