Túrikmenstannyń Dashoǵyz qalasyndaǵy mektepterde, taǵy birqatar aýdan ortalyqtarynda dárigerler men polıseıler oqýshylardyń telefondarynan pornografıalyq vıdeo jáne foto izdep, qyzdardy gınekologıalyq tekserýge jibergen, dep jazdy Qamshy.kz aqparat agenttigi centralasian.org saıtynyń deregin negizge ala otyryp. 

Mundaı tekseriske oblys ákiminiń bilim jáne mádenıet jónindegi orynbasary tapsyrma bergen, dep habarlady Azatlyk derekkózi.

«Tekserýge kelgender barlyǵymyzdyń telefondarymyzdy jınap aldy. Olar ne tekseretinin túsindirip jatpady. Biraq keıin olar pornografıalyq faıldar izdegenin aıtty. Oqýshylardyń barlyǵynan derlik mundaı faıldar tabyldy», — dedi Dashoǵyz oblysy, Gýrbansoltan aýdanyndaǵy orta mektep oqýshysy.

Onyń aıtýynsha, pornografıalyq faıldar tabylǵan soń mobıldi telefondaryn alyp qoıyp, mektep oqýshylarymen ata-analarmen birge áńgimelesken.

«Joǵarǵy synyptaǵy qyzdardy bir syzyqqa turǵyzyp qoıyp, mektep medpýnktinde teksergen. Páktigi tabylmaǵan qyzdardyń sheshelerin shaqyrtyp, búkil mektepke masqaralaǵan. Osy tekserýden soń mektep dırektoryn jumystan shyǵardy», — deıdi derekkóz.