Búgin Astanada Parlament Májilisiniń depýtattary, QR Aýyl sharýashylyǵy mınıstrliginiń ókilderi jáne qoǵam belsendileri jer týraly zań jobasyn talqyǵa saldy, dep jazady Qamshy.kz aqparat agenttigi. .

Alǵashqy bolyp sóz alǵan ólketanýshy Saǵat Júsip jer máselesin emosıaǵa berilmeı, kóteriliske shyǵyp dúrbeleń salmaı, órkenıetti túrde osyndaı otyrystarda sheshýge shaqyrdy.

– Búgin biz qazaqtyń bolashaǵyn aıqyndaıtyn másele boıynsha jınalyp otyrmyz. Búgin bizge barlyq qazaq jurtshylyǵy qarap otyr. Búgin barlyq qoǵam ókilderi, bılik, Parlament, basqa da azamattar osy qazaqtar ózderiniń qasıetti, kıeli máselesi – jer máselesin aıqaı-shýsyz, bir mámilege kelip, birin-biri tyńdap sheshe alady ma eken dep kútip otyr. Osydan eki jyl buryn biz bul máseleni mıtıńke shyǵyp sheshken edik, nátıjesinde bes jylǵa shegerilgen bolatyn. Búginde, mine, bes jyldaı ýaqyt ótti, endi ózimizdiń qanshalyqty órkenıetti ekenimizdi, saıası mádenıetimizdiń óskendigin kórsetýimiz kerek, – dedi ólketanýshy Saǵat Júsip.

Arnaıy baıandama jasaǵan vıse-mınıstr Erlan Nysanbaev jer týraly zań jobasy tórt suraq sheńberinde daıyndalǵanyn atap ótti. Onyń aıtýynsha, zań jobasynda jerdi sheteldikterge jalǵa berý jaıynda eshqandaı norma qarastyrylmaǵan eken.

– Bir paıyz bolsa da sheteldikterdiń úlesi bar qazaqstandyq kompanıalarǵa, zańdy tulǵalarǵa jer berilmeıtin bolady. Másele óte kúrdeli. Muny 2022 jylǵa deıin halyqpen birge talqylap, bir sheshimge kelý kózdelýde, – vıse-mınıstr.

Sonymen qatar Erlan Nysanbaıuly qandaı da bir suraqtar bolsa, halyqpen talqylap sheshýge daıyn ekenin jetkizdi.

Al Májilis depýtaty Berik Ospanov «Parlament jer týraly zańdy birjaqty qabyldap tastady» degen áńgime bolmasyn dep, zań jobasynyń qoǵamdyq talqylaýǵa shyǵarylǵanyn aıtty.

Zańger Abzal Quspan jerdi saýdaǵa salýǵa qarsy ekenin aıta kelip, zań jobasynyń túıtkildi jerlerin túırep ótti.

– Biz bir nárseni shatastyrmaıyq, qazir myna jerde qaralyp jatqan másele – zań jobasy. Parlamentte baqylaý tetikteri joq, eger bir jer ketip qaldy dese, Parlament ony baryp qaıtaryp ala almaıdy, ondaı quzyret Parlamentte joq. Zań jobasymen meniń kelisetin de, kelispeıtin de jerlerim bar. Eń aldymen bir nárseni bilip alaıyq – jer ózi kategorıa boıynsha jetige bólinedi: aýyl sharýashylyǵy maqsatyndaǵy jer, aýyl sharýashylyǵy maqsatyndaǵy emes jer, taǵy da basqa, odan keıingiler onsha mańyzdy emes. Bizge eń mańyzdysy – aýyl sharýashylyǵy maqsatyndaǵy jerler. Bul jerge qatysty 2021 jyldyń jeltoqsan aıyna deıin maratorıı  berilgen.

Meniń kóńilime kúdik uıalatatyn bir másele – aýyl sharýashylyǵy maqsatyndaǵy emes jerler. Ol jaı ǵana qurylystar, qorǵanys maqsatyndaǵy jerler, ǵımarat astyndaǵy jerler, polıgon, transportqa arnalǵan jerler – mine, munyń aýqymy óte keń, – dedi zańger.

Ol óz sózinde Qytaı men Reseıden tónip turǵan qaýip-qaterge alańdaýshylyq bildirdi.

– Batys Qazaqstan oblysy, Bókeı ordasy, birneshe aýdan, odan ary qaraı Atyraý, Aqtaýǵa deıin Reseıdiń polıgonyna jalǵa berilgen. Álemde bir de bir táýelsiz memleket áskerı polıgondaryn ózge memleketke jalǵa berip, ol jerge synaq júrgizdirip qoımaıdy. Bul – sumdyq jaǵdaı, – dep ashyndy Abzal Quspan.

Alaıda úsh jarym saǵatqa sozylǵan jıynda azamattar bir sheshimge toqtaı almady. Jıyn sońynda ár óńirden kelgen qoǵam belsendileri narazylyq tanytyp, «óz pikirimizdi aıta almadyq, bizdiń sózimizdi eshkim qulaǵyna ilgen joq», - dep shaǵymdanyp ketti.