Búgin Qazaqstan Respýblıkasy Din isteri jáne azamattyq qoǵam mınıstrliginiń Alqa májilisiniń keńeıtilgen otyrysy ótti. Alqa májilisiniń jumysyna QR Parlament depýtattary, ortalyq atqarýshy organdardyń, dinı birlestikterdiń, úkimettik emes uıymdardyń, qoǵamdyq keńesterdiń ókilderi, jastar uıymdarynyń kóshbasshylary, dintanýshy ǵalymdar jáne sarapshylar qatysty, dep jazady Qamshy.kz aqparat agenttigi QR Din isteri jáne azamattyq qoǵam mınıstrliginiń baspasóz qyzmetine silteme jasaı otyryp.
QR Din isteri jáne azamattyq qoǵam mınıstri Nurlan Ermekbaev Mınıstrliktiń 2017 jyly atqarǵan jumysynyń qorytyndylary jáne aǵymdaǵy jylǵa josparlanǵan mindetteri týraly baıandama jasady.
Mınıstrliktiń jumysy úsh strategıalyq maqsatty oryndaýǵa baǵyttalǵan: zaıyrlylyq prınsıpterin qamtamasyz etý jáne dinı turaqtylyqty saqtaý; azamattyq qoǵam men memlekettik ınstıtýttardyń seriktestigin damytý; eldiń áleýmettik-ekonomıkalyq damýyna jastardy tartý úshin jaǵdaı jasaý.
Din salasy
QR Prezıdenttiń Jarlyǵymen «Qazaqstan Respýblıkasynyń din salasyndaǵy memlekettik saıasatynyń 2017 – 2020 jyldarǵa arnalǵan tujyrymdamasy» bekitildi. Tujyrymdama negizinde «Qazaqstan Respýblıkasynyń keıbir zańnamalyq aktilerine dinı qyzmet jáne dinı birlestikter máseleleri boıynsha ózgerister men tolyqtyrýlar engizý týraly» zań jobasy ázirlendi. Zań jobasy aıasynda 12 normatıvtik quqyqtyq aktige (3 kodeks pen 9 zań) 53 túzetýler engizý qarastyrylǵan. Qazirgi ýaqytta Zań Parlament Májilisine engizildi.
2017 jyly tek qana mınıstrlikpen 10 774 ınternet-resýrstyń mazmunyna taldaý júrgizilip, onyń ishinde kúmán týdyrǵan 3555 saıt anyqtaldy. Sondaı-aq, 4332 materıalǵa dinı saraptama júrgizildi, onyń ishinde 196 obektige teris qorytyndy berildi. Olardyń ishinde qylmystyq atqarý júıesindegi kitaphana qory da bar. Olardyń ishinde 13 destrýktıvti kontent anyqtaldy.
Din máseleleri boıynsha respýblıkalyq aqparattyq-túsindirý toby eseptik kezeńde elimizdiń barlyq aımaqtarynda 250-den astam is-shara ótkizip, oǵan 20 myńnan astam adam qamtyldy. Óńirlerde 249 óńirlik aqparattyq-túsindirý toby jumys jasaıdy. Olar 2 mln. 500 myń adamdy qamtıtyn 35 myńnan astam ártúrli is-sharalar ótkizdi.
Qazaqstan Musylmandary dinı basqarmasy jáne Orys pravoslav shirkeýimen yntymaqtastyq týraly memorandým jasaldy. QMDB-men birge teologıalyq bilim berý júıesin jetildirý boıynsha sharalar qabyldanýda. «Nur Múbarak» Egıpet ıslam ýnıversıtetin Qazaqstanǵa berý jóninde kelissózder júrgizilýde. Meshit ımamdarynyń biliktilik deńgeıin arttyrý boıynsha sharalar qabyldanýda. «Nur Múbarak» ýnıversıtetiniń bazasynda Ekstremızmniń aldyn alý salasyndaǵy qaıta daıarlaý ınstıtýty quryldy. Atalǵan ınstıtýtta 65 ımam men maman-teolog daıyndyqtan ótti.
«Ýaqyp» qaıyrymdylyq qory quryldy. Imamdardy shákirtaqymen qoldaýdyń pılottyq jobasyn iske asyrý úshin asa kómekti qajet etetin meshitter men elimiz boıynsha 205 din qyzmetker anyqtaldy.
Azamattyq qoǵam salasy
«Komersıalyq emes uıymdar qyzmetiniń máseleleri boıynsha QR keıbir zańnamalyq aktilerine ózgerister men tolyqtyrýlar engizý týraly» Zań jobasy ázirlendi. Qujat 2017 jyldyń mamyr aıynda Parlament Májilisine engizildi.
«Volonterlik qyzmet týraly» QR Zańy qabyldandy, volonterlik uıymdardyń reestrin júrgizý boıynsha erejeler qabyldandy. Úkimettik emes uıymdarǵa grant taǵaıyndaý erejesine ózgerister engizildi.
Úkimettik emes uıymdardy granttyq qarjylandyrý. 2017 jyly granttyq qarjylandyrý sheńberinde 618,5 mln. tengeni quraıtyn 57 joba júzege asyryldy. Granttardyń úshten biri óńirlerdegi jumys pen jergilikti qaýymdastyqty damytýdy qamtydy. 2017 jyly respýblıka boıynsha memlekettik áleýmmettik tapsyrys sheńberinde 2 333 áleýmettik joba iske asyryldy. Úkimettik emes uıymdardyń syılyqaqylaryna 2017 jyly 68 mln. teńge bólindi.
«Úkimettik emes uıymdar derekqorynyń» jumysy jolǵa qoıyldy. Derekqorda 2017 jyly 3 myńǵa jýyq qazaqstandyq jáne sheteldik uıymnyń tájirıbesi jınaqtaldy.
«Qoǵamdyq keńesterdiń Úlgilik erejesin bekitý týraly» Úkimettiń Qaýlysy ázirlendi. Qujatta qoǵamdyq keńes jumystarynyń tetikteri naqty jazylǵan.
Azamattyq qoǵam salasynda jalpyulttyq dıalog sheńberinde basty eki dıalog alańdarynyń jumysy qamtamasyz etildi: Qazaqstannyń azamattyq forýmy jáne Din isteri jáne azamattyq qoǵam mınıstrligi janyndaǵy ÚEU arasyndaǵy ózara is-qımyl jónindegi Úılestirý keńesi.
Mınıstrlik «Rýhanı jańǵyrý» baǵdarlamasynyń «Týǵan jer» baǵytyndaǵy «Atameken» kishi baǵdarlamasyn júzege asyrýda. Kishi baǵdarlama aıasynda «Áleýmettik bastamalar kartasy» jáne «Jomart júrek» 2 negizgi baǵyty iske asyrylýda.
Jastar saıasaty
Memleket basshysynyń «Bolashaqqa baǵdar: rýhanı jańǵyrý» baǵdarlamalyq maqalasynyń negizgi mindetterin eskere otyryp, 2020 jylǵa deıingi «Qazaqstan-2020: bolashaqqa jol» memlekettik jastar saıasatynyń tujyrymdamasyn iske asyrý jónindegi is-sharalar jospary ózektendirildi.
Jastar ÚEU jobalaryn qarjylandyrý tásilderi ózgerdi. 2017 jyly alǵash ret granttyq qarjylandyrý engizildi. 2017 jyly jastar ÚEU 30,9 mln. teńge somasynda 3 grant iske asyryldy.
QR Prezıdentiniń 2017 jylǵy 20 qazandaǵy Jarlyǵymen janyndaǵy Jastar saıasaty jónindegi keńestiń jańa quramy bekitildi. Keńesti Memlekettik hatshy basqarady, quramyna ortalyq memlekettik organdardyń birinshi basshylary kiredi.
QR Premer-Mınıstriniń tapsyrmasy boıynsha jastardyń bos ýaqytyn ótkizýdi uıymdastyrý maqsatynda barlyq óńirlerde 2020 jylǵa deıingi jastardyń bos ýaqytyn uıymdastyrý josparlaryn iske asyrý bastaldy. «Daryn» memlekettik jastar syılyǵyn jyl saıyn berý týraly sheshim qabyldandy. 2017 jyly jazǵy demalystar kezinde «Jasyl eldiń» 24 537 jasaǵy eldi mekenderdi abattandyrý jáne kógaldandyrýǵa, onyń ishinde «Nurly jol» obektilerine - 3 249 adam tartyldy.
