2018 jyldyń 26 aqpanynda Qazmedıa ortalyǵynyń 5-shi stýdıasynda “Qazaqstan” RTRK AQ Basqarma tóraǵasy Erlan Qarın Ulttyq arnanyń kóktemgi televızıalyq maýsymymen tanystyryp, jańa jobalary jaıly aıtyp, 2017 jyldyń negizgi jetistikterin atap ótti. Bul týraly Qamshy.kz aqparat agenttigi habarlaıdy.
Qazaqtyń tól ónerin dáripteıtin “Men qazaqpyn” halyqaralyq mýzykalyq jobasy men 8 memlekette tikeleı translásıa arqyly kórsetilgen “SilkWayStar” megajobasy kórermender arasynda joǵary baǵalanyp, ótken maýsymnyń basty jańalyǵy boldy.
Sondaı-aq, 2017 jyly “Parasat maıdany”, “1stýdıa”, “Basty taqyryp”, “Másele”, “Elden habar” jáne t.b qoǵamdyq-saıası jáne aqparattyq-saraptamalyq jobalardyń sany artyp, kórermenge jol tartty.
Sonymen qatar, Ulttyq arna memlekettik mańyzy joǵary túsirilimder men tikeleı translásıalardy júzege asyrdy. Atap aıtsaq, 2017 jylǵy Qysqy Ýnıversıada, Áskerı sherý, halyqaralyq mamandandyrylǵan “Astana EKSPO-2017” kórmesiniń ashylý men jabylý saltanaty, QR prezıdentiniń qatysýymen ótken “Indýstrıalandyrý kúnine” arnalǵan elimizdiń 26 nysanyn qamtyǵan telekópir ótkizildi.
“Ótken jyly kontentti jańartý barysynda áleýmettik jobalardyń sany artty, aqparattyq-saraptamalyq baǵdarlamalardyń formaty ózgerdi. Eń bastysy, ózimizdiń ishki teleónimniń úlesi 80%-ǵa ósti, ıaǵnı bul syrttan satyp alynbaǵan kontent. Biz ári qaraı da kontentti jańartý jumystaryn jalǵastyryp, sapaly týyndylardyń sanyn arttyrýǵa atsalysamyz», dedi Erlan Qarın.
Ulttyq telearnada jańa televızıalyq maýsym dástúr boıynsha, naýryz aıynyń basynan bastalmaq. «Qazaqstan» telearnasynan birneshe jańa jobalar men telehıkaıalar kórermenge jol tartady. Burynnan kele jatqan tanymal jobalardyń júrgizýshileri aýysyp, endi “Túngi stýdıany” akter ári syqaqshy Qaırat Ádilgereı júrgizse, “Senbilik shoýdyń” tizginin Tursynbek Qabatov ustaıdy. Sondaı-aq, jańa maýsym aıasynda aqpan aıynda efırge shyqqan “Baqytty áıel” tok-shoýy áıelder arasynda úlken suranysqa ıe. Bul baǵdarlamada keıipkerler óziniń basynan ótken qyzyqty oqıǵalary men baqytty bolýdyń qyr-syrlarymen bólisedi. Aldaǵy ýaqytta elimizdiń tarıhynan syr shertetin “Alash aqıqaty” baǵdarlamasy men “Bala kóńili” atty balalar tárbıesin qozǵaıtyn gýmanıtarlyq-aǵartýshylyq joba shyǵatyn bolady.
“Kóktemgi maýsymnyń basty tusaýkeseri «Júrsinniń júırikteri» atty aqyndar saıysy bolmaq. Aıtysta 20 shaqty aqyn aıtysyp, óz ónerlerin ortaǵa salady. Bul joba birneshe aı boıy júredi, ulttyq naqyshty saqtaı otyryp, jańa formatta usynatyn bolamyz”- dedi Erlan Karın.
«Júrsinniń júırikteri» baǵdarlamasynyń qazylar alqasynda belgili óner qaıratkerleri: qazaq kınosynyń maıtalmany, QR halyq ártisi Asanáli Áshimov, ánshi ári kompozıtor, QR halyq ártisi Altynbek Qorazbaev, profesor, ǵylym doktory Namazaly Omashev pen QR halyq aqyny Asıa Berkenova. Al, jobanyń basty qonaǵy QR eńbek sińirgen qaıratkeri, aqyn jáne jýrnalıs Júrsin Erman saıys arasynda pikirin aıtyp otyratyn bolady.
Sonymen qatar, Ulttyq arna jas aýdıtorıany arttyrý maqsatynda, qyzyqty ári erekshe «Q-pop Idols» atty jobanyń tusaýyn kespek. Bul jobanyń jetekshisi belgili mýzykant, prodúser Erbolat Bedelhan.
Jańa maýsym aıasynda birqatar jańa otandyq telehıkaıalar usynylatyn bolady. 26 naýryzdaa Alash zıalylarynyń 20-shy ǵasyrdyń basynda Táýelsizdik jolyndaǵy taǵdyryn baıandaıtyn “Tar zaman” telehıkaıasy efırge shyǵady. Atap aıtqanda, kórermender «Týǵan jer», «Súıe bilseń-2», «Jaralanǵan júrekter», «İńkár júrek-3» jáne t.b telehıkaıalardy tamashalaıtyn bolady.
Belgili bolǵandaı, bıyl Qazaq televızıasy 60-jyldyq mereıtoıyn atap ótýde. Osy aıtýly mereke qarsańynda “Qazaqstan” telearnasy birneshe is sharalardy ótkizip keledi.
«Ulttyq arnada ár jyldary kóptegen tanymal tulǵalar, zıaly qaýym ókilderi eńbek etip, Qazaq televızıasynyń damýyna úlken úlesin qosty. Olardyń atqarǵan orasan eńbekterin umytpaý - bizdiń paryzymyz. Aqpannyń basynan bastap, ár jeksenbi saıyn Ulttyq arnanyń “Altyn qorynda” saqtalǵan, kezinde kórermenniń kóńilinen shyqqan burynǵy baǵdarlamalardy efırge shyǵarýdy uıǵardyq. Sondaı-aq, Ulttyq arnanyń “Tańsholpan”, “Dara jol”, “Kelbet” jáne basqa da baǵdarlamalarynda otandyq televızıa ardagerleriniń qatysýymen arnaıy shyǵarylymdar jaryq kóredi. Munymen qosa, kórermenderge tosyn syı retinde, burynǵy telejýrnalıster men dıktorlar júrgizýshi bop efırge shyǵatyn bolady», dep aıaqtady sózin Basqarma tóraǵasy Erlan Qarın.
