Qazaqstanǵa Ońtústik Koreıanyń álemge tanylǵan akteri Lı Mın Ho kelýi múmkin. Al odan buryn úndiniń "Kelin" serıaly arqyly tanymal akter Sıdhart Shýkla da jergilikti kórermenimen qaýyshpaqshy. Bul týraly aqparat "Qazaqstan" telearnasyndaǵy "Túngi stýdıa" baǵdarlamasynyń Instagram jelisindegi resmı paraqshasynda habarlandy.

"Lı Mın Honyń fanattary, jankúıerleri! Úndi akteri "Shıvtiń" kele jatqany Lı Mın Hony shaqyrmaıdy degen sóz emes! Dál qazir Koreıamen kelissózder júrgizilip jatyr...", - delingen áleýmettik jelidegi paraqshada.

Lı Mın Ho - akter, model ári ánshi. Ol "Jıdekterden keıingi gúlder" (2009), "Qala ańshysy" (2011) jáne "Muragerler" (2013) sıaqty doramalarǵa (teleserıal) túskennen keıin tanymal boldy.

KVN oıynshysy Nurlan Qoıanbaev júrgizetin shoýǵa koreı akterinen buryn úndiniń "Kelin" serıalynyń juldyzy, Shıv rolinde oınaıtyn Sıdhart Shýklanyń keletini belgili boldy. Bul týraly Qoıanbaev Instagram jelisindegi resmı paraqshasynda "Túngi Stýdıada" - jýyrda úndi kınosynyń jarqyn juldyzy, "Kelin" serıalynda basty rólderdiń biri Shıvtiń rólin somdaǵan akter - Sıdhart Shýkla!", - dep jazdy.

©iplay.kaztrk.kz

Eske salaıyq, buǵan deıin qazaqstandyqtar súıip kóretin teleserıaldyń negizgi juldyzy - Anandı rolinde oınaǵan Avıka Gor kelip ketken edi. Aktrısa otandyq birneshe baǵdarlamanyń túsirilimine qatysyp, kórermenderiniń ystyq yqylasyna bólendi.