Qazaq kásipqoı boksshysy Qanat Islam óziniń 19-kezdesýin 1 naýryzda Máskeýde ótkizedi. Ol Gýıdo Nıkolas Pıttomen (Argentına) kezdesedi. Bul kezdesýde jeńiske jetken boksshy orta salmaqta WBA International chempıondyq ataǵyn ıelenedi. 27 jastaǵy Pıtto 22 kezdesý ótkizip, 19 machta jeńip, úsheýinde jeńilgen. Al 31 jastaǵy Qanat Islam 18 kezdesý ótkizip, barlyǵynda jeńiske jetken. Qanat Islam 18-kezdesýin 2014 jyly tamyzda ótkizip, kolýmbıalyq  Fıdel Monterros Mýnosty jeńgen edi. Qytaıda týǵan etnıkalyq qazaq Qanat Islam 2008 jyly Pekın olımpıadasyna sol eldiń atynan qatysyp, qola júlde ıelengen. Ol 2010 jyly Qazaqstan azamattyǵyn alyp, «Astana arlandary» klýbynda bokstasyp júrdi. Boksshy 2012 jyly London olımpıadasyna atajurtynyń atynan qatysýyna baılanysty azamattyq-quqyqtyq daý týǵan soń kásipqoı boksqa bet buryp, AQSH-qa ketken.