Shıpajaıda jatqan bir top adam túski astan keıin áńgime-dúken qurady. Sonda bir malshy mynandaı qyzyq áńgime aıtqan eken: - Bizdiń elde bir eki qabat áıel barys aýlaǵany bar. Kúıeýi birneshe kúndik saparǵa shyǵatyn bolyp, aıy men kúni jaqyndaǵan aıaǵy aýyr áıeli men bes jasar kishkentaı qyzyna serik bolsyn dep bir inisin shaqyryp qaldyryp ketedi. Kámeletke tolǵan, deneli jigit bolǵanymen álgi bala sál alańǵasyrlaý bolsa kerek. Tań sáride qoradaǵy qoı dúrkirep úrkip bolmaǵan soń shyǵyp qarasa, bir ala shubar barys qoılardy jaryp, serkelerdi baqyrtyp turyp jaıratyp jatyr eken deıdi. Qonaq jigit úıdegi kalıbr myltyq ala salyp «oq, oq!» dep asyqtyrady. Áıel jalma jan bir dorba oqty sandyqtan alyp bere qoıady. Jigit otyra qalyp atqanymen, dál tımedi me, álde, jaralady ma álgi barys jalt qaraıdy da úıge qaraı sekiredi. Abyrjyǵan jigit úıge qashyp kirip, esikti bekitkende álgi dorbadaǵy oqty dalada qaldyryp ketipti. Barys bir sekirip kıiz úıdiń tóbesine shyǵady da, shańyraqtyń kúldireýishinen basyn qyltıtady. Áıel qolyna ot kóseıtin temirdi alady da tumsyqtan bir peredi. Barys yrǵyp kelip úıdiń ortasyna top ete qalady. Kishkentaı qyzyn súırep, áıel tósek astyna kirip ketedi. Jigit qashyp shyqpaq bolyp, esikti ashqanda barys jaryq shyqqan jaqqa týra umtylady da taltaıyp turǵan jigittiń eki butynyń arasyna keptelip qalady. Jigit dereý onyń eki qulaǵynan bas salyp, bosaǵaǵa eki aıaǵyn tireı qoıady. Barys eki jaqqa alma kezek yryldaǵanda jigittiń jeńin jyrtyp, bilegin qanatady. -Pyshaq ákel! Pyshaq sal, mynaǵan! – dep, onyń jan daýsy shyǵa aıǵaılaıdy. Sasqalaqtaǵan áıel zorǵa degende kúıeýniń iri qara soıatyn uzyn pyshaǵyn tabady. Ony barysqa shanshyp kórse, ushy nashar ma, kirmeıdi. Jigittiń «tezdet, tezdet!» dep shyryldaǵan daýsynan esi shyqqan áıel barystyń keýde tusyn dáldep turyp, kózdi jumady da qos qoldap bar kúshimen ıteredi. Uzyn pyshaq kirsh etip kirip, kelesi jaǵynan biraq shyǵady. Kózin ashyp qarasa barys dir-dir etip ólip barady eken. Jigittiń eki qoly barystyń eki qulaǵyna jabysyp qalǵandaı alynbaǵan soń qoı qyrqatyn qaıshymen jyrtqyshtyń qulaǵynyń túbinen kesip alady. Barystyń qos qulaǵyn tas qyp ustaǵan kúıi jigit talyp qulaıdy. Súıegine taqap tistelgen eki qolynan qan aǵyp jatyr. Syrtta eshbir kólik joq. Áıel kishkentaı qyzyn súırelep aýyl ortalyǵyna qaraı júgiredi. Abyroı bolǵanda aýyl ortalyǵy on shaqyrymdaı ǵana eken. Bir saǵattan keıin aýyl ákiminiń tabaldyryǵyn attaǵan áıel: - Bizdiń úıle sumdyq boldy! – deýge ǵana shamasy jetip, talyp túsedi. Aýyldan bir top adam mashınamen asyǵys jetse, qoılary mańaıda túk bolmaǵandaı jaıylyp júr. Al, úıde uzyn pyshyq shanshylǵan barys ólip jatyr. Qolynda barystyń eki qulaǵyn tas qyp ustaǵan jigit talyp qalypty deıdi. Bul hıkaıadan soń jınalǵandar shýlap: - Álgi áıelge úkimetten qandaı syılyq berdi? Áı, ózi de batyr kelinshek eken-á?! Sóıtse, malshy qoldy bir siltep: - Qaıdaǵy?! Bizdiń basshylar qatal zańǵa tym qatty baǵynady. «Qyzyl kitapqa» engen ańdy óltirgeni úshin isti bolyp, aıyppulmen zorǵa qutyldy ǵoı, – dep qarap tur deıdi.
Qýandyq Shamahaı, Facebook paraqshasynan
