«Nur Otan» partıasy Elbasynyń tapsyrmasy boıynsha «El analary» atty jańa aksıany qolǵa aldy. Bul týraly partıa tóraǵasynyń birinshi orynbasary Máýlen Áshimbaev óziniń Facebook-tegi paraqshasynda jazdy, dep habarlaıdy Qamshy.kz aqparat agenttigi.
«Qymbatty dostar!
Shuǵylaly kóktemniń shýaq shashar merekesi – 8 naýryz Halyqaralyq áıelder kúni de kelip jetti.
Búginde elimizde júzdi eńsergen 415 ájemiz bar. Olardyń ǵıbratty ǵumyry jas urpaq úshin qashanda úlgi, ónege ekeni sózsiz. Osy qundylyqty keńinen nasıhattaýdyń nátıjesi mol bolary anyq.
Sondyqtan nurotandyqtar atalǵan aksıa sheńberinde tek óz áýletiniń ǵana emes, elimizdiń de altyn qazyǵy bola bilgen ájelerimizdi quttyqtaýdy bastap ketti. Qazirgi tańda elimizdiń barlyq óńirinde partıa ókilderi aq jaýlyqty analarymyzdy úılerine arnaıy baryp quttyqtap, olarǵa merekelik kóńil-kúı syılaýda.
Osy aksıa aıasynda biz de Astana qalasynyń turǵyny, jasy 103-ke kelgen Dospolova Dana ájemizdi barsha nurotandyqtardyń atynan quttyqtap, analyq aq alǵysyn alyp qaıttyq. Dana Qulmuhamedqyzy jastaıynan eńbekke aralasqan jan. Tipti el tarıhynda erekshe mańyzǵa ıe Transsibir temirjoly magıstraliniń qurylysyna da úles qosqan. Al soǵys jyldarynda tylda eńbek etip, Uly Jeńisti jaqyndatqan jandardyń qatarynda boldy.
Bul ıgi is-shara mereke kúnderi de jalǵasady. Ǵasyr jasaǵan jáne júzden asqan barlyq ájelerimizdi jeke-dara quttyqtaý – bizdiń abyroıly mindetimiz. Endeshe partıamyzdyń tyń bastamasyna barshamyz at salysaıyq.
Osy rette 8 naýryz merekesimen barsha aq jaýlyqty ájelerimiz ben aıaýly arýlarymyzdy shyn júrekten quttyqtaımyn! Kóńilderińizden qýanysh, júzderińizden jylý ketpesin! Aldaǵy ýaqytta shańyraqtaryńyzǵa shattyq, denderińizge saýlyq, otbasylaryńyzǵa amandyq jáne uzaq ǵumyr tileımin!», – dedi Máýlen Áshimbaev.
Pikir qaldyrý