Almatyda "Sálem", "Jetisý" jáne "Rahat" bazarlary jabylady dep habarlaıdy "Almaty arnasyna" silteme jasaı otyryp Qamshy.kz portaly.

"Baraholkanyń" beti beri qarady. Búginde bılik tistegenniń aýzynda ketken 20 gektardan astam telimdi memleketke qaıtarǵan. Sonymen, 20 bazar tolyq súrilipti. Qalalyq jer basqarmasy mamandary osyndaı málimet aıtady. Sózderinshe, qazir "Sálem", "Jetisý" men "Rahat" bazarlary buzylýda. Taǵy 5 saýda ornyna qatysty sot sheshimi kútilýde.

10 jyl boıy "Sálem" bazarynda tamaq jasap satqan Mınohanym asqanasyna qajetti zattaryn jınaý úshin sońǵy ret keldi. Kásipker jumys ornyn qımaıdy. Biraq ókinishi de joq. Sebebi, dámhana órtke qaýipti ári tazalyq talaptaryna saı kelmeıdi. Ony ózi de moıyndaıdy. Sondyqtan jańa salynyp jatqan saýda úıine erterek kóship, kásibin jalǵastyrýdy josparlaýda.

«Buryn sýyqta boldyq. Endi jyly jerge baramyz. Bul bizdiń kafe. Sony bosatyp jatyrmyz. Bazar súrildi ǵoı. Endi onyń ornyna dalada qalmaıtyndaı, jańa jer shyǵar dep úmittenemin», - dedi aspazshy Mınohanym MÁMETOVA.

Bazar basshysy «birde-bir kásipker dalada qańǵyp qalmaıdy» dep sendirdi. Sebebi, kezinde 300 saýdager jumys jasaǵan bazar buzylǵanymen, ornyna 400 dúńgirshekke arnalǵan jańa keshen boı kótermek. Satýshylardyń usynysyn tyńdaǵan qojaıyn «jańa orynda saýda jasaý satýshylardyń qaltasyn juqartpaıdy» dep otyr.

«Jaǵdaı jasalynǵan, jaryq, sý bar. Gaz tartyp qoıdyq. Jylý da bar. Jalǵa berý quny durys bolady. Saýdagerlerdiń qaltasy kóteredi dep oılaımyn»,- dedi bazar basshysy Baqytjan QURMANBAIULY.

Jer qatynastary basqarmasynyń málimetinshe, 15 jyl boıy jumys jasaǵan "Sálem" bazary memlekettiń 1 jarym gektar telimin zańsyz ıemdenip alǵan. Osy sekildi qyzyl syzyqtan asyp ketken 26 bazardyń isi sotta qaralyp, biraýyzdan jer telimderin qaıtarý týraly sheshim shyǵypty.

«Bizde sottyń sheshimderi shyǵyp jatyr. Endi «Batyr» men «Evrazıa» bazarynyń sot sheshimi shyqsa, súrý jumysyn bastaımyz. 1-2 aıdyń ishinde súrý jumystaryn bitiremiz»,-dedi Almaty qalasy jer qatynastary basqarmasynyń bas mamany Erlan JARMUHANBETOV.

«Baraholkadaǵy» qyzyl syzyqta turǵan bazardyń barlyǵy sáýir aıyna deıin tolyq súrilip bitedi. Al, naýryz aıynan bastap keńeıtilgen qalaaralyq kúre joldyń qurylysy bastalady dep josparlanýda. Osy rette zańsyz ıemdengen 20 gektardan astam jer telimi memleketke qaıtaryldy.

Osy kúnge deıin «Baraholkada» 20 bazar súrilse, jańa 9 saýda úıi boı kóterip úlegergen. Basshylardyń aıtýynsha, aldaǵy 2 jylda soltústik aınalma joldyń boıynda 30-ǵa jýyq saýda kesheni turǵyzylyp, 10 myńǵa jýyq kásipker jumyspen qamtylmaq.