Adamnyń óz aldyna qoıatyn mańyzdy tapsyrmalarynda tabysqa jetýi nemese sátsizdikke ushyraýy onyń psıhologıalyq ahýalyna baılanysty. Egerde ol kóksegen muratyna jetemin dep, óz-ózin sanalyq turǵydan sendirse, Allanyń qalaýymen degenine jetedi.

Al, namazdyń maqsaty ─ Allaǵa jaqyndaý. Namaz oqymas buryn sol maqsatqa nıettený kerek, dittegenimdi oryndaımyn degen oıda bekem ári tabandy bolý qajet. Osylaısha, siz namazǵa daıyndalasyz. Dáret alý kezinde óz-ózińizge ishteı: «Men Allanyń quzyryna baramyn!»  -dep oılańyz. Onymen kezdesý úshin jasap jatqan áreketińizdiń sebebimen kúnálaryńyzdyń tógiletinin eske alyńyz. Alla Taǵala Óz qulynyń namazda Onymen kezdesýge degen tilegin laıyqty túrde baǵalap, onyń kúnálaryn keshiredi. Alla Taǵalamen júzdesýdiń negizinde shyndyǵynda ne jatqandyǵyn oılanyp kórińiz. Sizdiń rýhanı saıahatyńyz osy jerden bastalady.

Namazǵa turǵan kezde Allanyń aldynda turǵanyńyzdy jaqsylap sanańyzǵa quıyp alýǵa tyrysyńyz. Tym bolmaǵanda, «Alla meni kórip tur» degen senimde bolýǵa talpynyńyz. Allanyń ulyqtyǵyn oılańyz. «Allahý Akbar» degen Tahrıma Tákbiriniń sózderi Allanyń ulyqtyǵyn tolyq uǵynýmen, júregińizdiń túkpirinen shyǵýy tıis. Ózińiz oılap kórińizshi, Onymen tildesý múmkindigine ıe bolǵan siz netken baqyttysyz. «Bul ─ meniń sońǵy múmkindigim. Kelesi namazǵa deıin ómir súrmeýim múmkin», - dep elestetińiz.

Shyn júregińizben, bar jan-tánińizben, aqyl-oıyńyzben qulshylyq jasańyz. Bar nazaryńyz Allanyń páktigi men Onyń ulyqtyǵynda bolsyn. «Ál-Fatıha» súresi men odan keıingi súrelerdi oqyǵanda ondaǵy sózderdiń maǵynasyna oı júrgirtińiz. Bul ─ sizdiń Allaǵa baǵyttalǵan sózderińiz. «Qurandy óz tilimmen oqı alatyn men ne degen baqytty jan edim», - dep ishteı túsinińiz. Rýkýǵqa barǵanda ózińizdiń jaı ǵana ıilmegenińizdi, Allaǵa boıusynyp ıilgenińizdi qaperińizge alyńyz. Jaratqan Iemizge degen qurmetińizdi bildirip, «SýbhanaLlahýl azım» ulyqtaý sózderin Allany madaqtaýdan lázzat alyp, shyn júregińizben aıtyńyz.

Sájdege barǵanda basyńyzdan bastap, aıaǵyńyzǵa deıin búkil tánińizdiń óziniń Jaratýshysynyń aldynda turǵanyn este saqtańyz. Biz Soǵan ǵana baǵynamyz jáne Jaratqan Rabbymyz kemshilik ataýlydan Pák (Sýbhana Rabıl Al’a) ekenin aıtamyz. Tashahýdta «Áttáhıatty» oqyp otyryp, Paıǵambardyń, oǵan Allanyń ıgiligi men sálemi bolsyn, Mıǵraj kezinde óziniń boıusynýshylyǵyn bildirgenin oılańyz. Al, sizdiń muny namazda suraýǵa múmkindigińiz bar: «Meniń namazym – meniń Mıǵrajym. Men Allanyń aldyndamyn». Namaz kezinde qasyńyzda perishteler bolady. Sálem bergende oń jaǵyńyz ben sol jaǵyńyzdaǵy perishtelerge sálem berýge nıettenińiz. Namazdy oqyp bolǵan soń ıstıǵfar jasap, Allanyń barlyq quqyqtarynyń ornyn toltyra almaıtyndyǵymyz úshin Odan keshirim surańyz.

Sodan soń Alladan namazyńyzdy qabyl alýyn surap, duǵa jasańyz. Namazdy osyndaı deńgeıde oqýǵa jetý úshin kúsh salý kerek. Bar aqyl-oıyńyzdy Allaǵa buryp, qysqa namazdan bastańyz. Sóıtip, ony birte-birte uzartyńyz. Namazyńyzdyń sapasy artqanda júregińizdegi kirshiksiz nıettiń qaıta jandanǵandyǵyn sezinesiz. Onyń sizdiń ómirińizdiń barlyq tustaryna yqpal eteri shúbásiz. Sodan keıin ózińizdi basqasha sezinetin, basqasha sóıleıtin, basqasha kóretin, tipti basqasha estıtin bolasyz. Osynyń bári Allanyń sizdi kórip turǵanyn túısinýdiń arqasynda. Mundaı namazdy oqý kezindegi júrek tynyshtyǵyn eshqandaı jaılylyq pen sán-saltanatqa satyp ala almassyz, sirá.

muftyat.kz