Almatyda "jeńgetaılyqty" kásip etken Qyrǵyzstan azamatshasy ustaldy. Bul týraly qalalyq İİD baspasóz qyzmeti habarlady.
Uıymdasqan qylmysqa qarsy kúres basqarmasynyń habarlaýynsha, 23 jastaǵy boıjetken Jansúgirov kóshesiniń boıyndaǵy qonaq úılerdiń birinde jezóksheler ordasynyń jumysyn úılestirip kelgen.
"Qazir azamatshaǵa qarsy Qylmystyq kodekstiń 309-baby boıynsha (jezóksheler ordasyn uıymdastyrý, jezókshelikpen aınalysýdy uıymdastyrý, jeńgetaılyq) tergeý jumystary qozǵaldy", - dedi İİD uıymdasqan qylmyspen kúres basqarmasynyń basshysy Tańat Nazanov.
Onyń aıtýynsha, qoǵamdyq oryndarda jynystyq qatynas qyzmetin usynǵan boıjetkenderge qarsy qalalyq polısıa keshendi jospar qurǵan.
"Ótken jyly 96 qonaq úıde jezókshelerdiń qyzmeti usynylatyny anyqtaldy. Olardyń ıelerine 26 mln teńge kóleminde aıyppul salyndy. Bizdiń usynysymyzben 9 qonaq úıdiń jumysy toqtatyldy", - dep qorytyndylady Nazanov.
2014 jyly Almaty polısıasy jezókshelikti uıymdastyrý boıynsha 100 qylmysty áshkereledi. Onyń ishinde 2 jaǵdaıda kámelettik jasqa tolmaǵan jas jetkinshekter saýdalanǵan. "QazAqparat"
