Myna bir kishkentaı súıkimdi balaqaıdyń esimi Nurmuhammed Jaqyp. Bul bala alǵashynda «Instagram» arqyly áleýmettik jeli qoldanýshylarynyń arasynda tanymaldyqqa ıe bolǵan edi. Búginde ónerli balapan óziniń erekshe daýysynyń, súıkimdi kelbetiniń arqasynda jurtshylyqqa keńinen tanylyp úlgerdi. Nurmuhammedtiń túr-kelbeti de, daýysy da belgili ánshi Meırambek Bespaevqa uqsaıdy. Sondyqtan Meırambek pen Nurmuhammmedtiń ónerine tántti ónersúıer qaýym balaqaıdy «ekinshi Meırambek» dep atap ketken. «Alash aınasy» Nurmuhammmedtiń oryndaýyndaǵy ánder men erekshe sýretterin kópshilik nazaryna usynyp otyr. Nurmuhammed Jaqyptyń jasy 8-de, ol Aqtaý qalasynda turady. Ónerli balanyń ákesi Ibragım Jaqyp balasynyń ánderin, sýretterin, otbasylyq sýretterin únemi áleýmettik jelide bósisip otyrady. Kásibı ánshiler alǵash Nurmuhammedtiń ánderin tyńdaǵanda ony «naǵyz bombaǵa» teńepti. Óziniń keiń tynysty, tunyq daýsymen kópshilikti eleń etkizgen súıkimdi bala fotossesıada, toılarda, sahnada, beınerolıkterde ózin úlken jigit sekildi ustaıdy. Nurmuhammedtiń súıikti ánshisi, árıne, Meırambek Besaev. Belgili ánshi óziniń kishkentaı fanatyna, onyń ónerine qurmetpen qaraıtynyn aıtqan. Búginde Nurmuhammed Meırambekti kishkene kezinde dúıim halyqqa tanytqan «Boztorǵaı» ánin oryndap júr. Daryndy balanyń armany Meırambek Bespaevtyń jeke konsertine qatysý eken. Kishkentaı «Juldyz» Meırambek Bespaevtan basqa Qaırat Nurtastyń, Tóreǵalı Tóráliniń repertýaryndaǵy ánderdi oryndaıdy. Balaqaıdyń aıtýynsha, kez kelgen ándi oryndaý oǵan qıynǵa soqpaıtyn kórinedi. Degenmen óner ıeleri, onyń ishinde ánshi Abaı Begeı Nurmuhammedke úlken qoldaý bildirý qajet ekenin, 13-16 jas aralyǵynda onyń daýsyn saqtap qalý kerektigin alǵa tartty. Iá, talant qanmen beriletin qaseıt. Degenmen boıynda Allanyń bergen daryny bar balalardy shyrǵanyn sóndirip almaı, jaǵa bilý de ekiniń birine berile bermeıtin qasıet. Kezinde Altynbek Qorazbaev sekildi kóregen ustazdar eldi, jerdi aralap, aýyldardan kishkentaı daryndy balalardy taýyp, olardyń juldyzyn jaqty. Al qazirgi aqparattyń qarqyndy damyǵan shaǵynda balalardyń darynyn kópshilikke tanystyrý asa qıyndyq týdyrmaıdy. Tek balalardan «juldyz» jasaımyz dep asyra siltep, olardyń balalyǵyn joǵaltyp almasaq bolǵany. Kishkentaı Nurmuhammedtiń óneri órleı bersin! Til-kózden aman bolsyn dep tileımiz!!!