Keshe Qaraǵandyda 16 kósheniń atyn aýystyrý týraly tyńdaý ótti. Bul jaıynda jýrnalıs Lázzat Qojahmetova óziniń Facebook paraqshasynda habarlady. 

Jýrnalısiń aıtýynsha, tórt jyldan keıin ótip turǵan tyńdaý aıqaı-shýmen ótken.

— Bul kóshelerdiń ataýyn sol kóshelerdi óz qolymen turǵyzǵandar ǵana ózgertýi kerek,- dedi bir turǵyn, Qaraǵandy qalasy ózge ulttardyń arqasynda salyndy degen emeýrin tanytyp. Bul usynys jınalǵandardyń qarsylyǵyn týdyrdy. "Halyqqa aldyn ala habarlanǵan joq. Talqyǵa salynbady" dedi sol azamat. Bul sózge Aısultan Jaqypov (qaraǵandylyq blogger)  kúıip ketti, - dep jazdy L. Qojahmetova. 

— Áleýmettik jelilerde baıaǵydan talqyǵa salynyp jatyr. Siz qazaqsha bilseńiz biler edińiz, - dedi jıyn barysynda Aısultan Jaqypov. 

«Qazaqstan» RTRK» AQ Qaraǵandy oblystyq fılıaly dırektorynyń orynbasary  Jánibek Sadyqanovtyń aıtýynsha,  bul másele ótken jyldyń qarashasynan bastap talqyǵa shyǵarylǵan.

— Kırpıchnaıa tarıhı ataý emes pe? Ol nege ózgerýi kerek, - degen suraq qoıyldy. Oǵan dáleldi jaýap berildi. Jıyn barysynda ultaralyq tilde sóıleý de usynylǵan.

Saıasatker Aıtkoja Fazylov: Konstıtýsıada ultaralyq til degen sóz joq. Memlekettik til - qazaq tili degen bap bar. Kúnine eki sóz jattasańyzdar bir jylda 600 sóz úırenetin edińizder. Qazaqsha sóılep úırenińizder,-dedi. 

Qaraǵandy turǵyny Jeksen Abdrahmanov Lenın kóshesin osy ýaqytqa deıin ózgertpeýdiń sebebi qandaı degen saýal qoıdy.  

— Meniń bilýimshe, Qaraǵandyda 600-ge taıaý kóshe bar. Sonyń tym bolmasa júzi zamanǵa saı ataýǵa ıe me? Kúmánim bar. Qalǵan 400-500 kóshe zamanaýı atqa ıe dep kimdi sendirmek? Jylyna 30 kósheniń atyn aýystyrýdy daýysqa salady eken. Sonda Qaraǵandyny qazaqylandyrý úshin neshe besjyldyq kerek? Daýysqa salǵanda kóshe atyn aýystyrýǵa bar joǵy 6 adam qarsy ekeni belgili boldy. Qoldaıtyndar bir qaýym el eken. Jınalǵandardyń deni aqsaqaldar. Jastardy bul másele qyzyqtyrmaı ma?, - dep jazdy Lázzat Qojahmetova.