"Qazaq handyǵyna 550 jyl" shyǵarmashylyq báıgesine
Arǵy jyldar arǵymaqtyń jalynda,
Qus uıqymen tún qatyp,
Jaýǵa dúbir tyńdatyp,
Terligi attyń ýlanyp,
Qonystanyp ný baryp,
Toǵyz qabat torqaly,
Rýh sińgen týdy alyp,
Jaýǵa shapqan el edik.
Arǵy jyldar qara nardyń beline,
Keregeni qom qylyp,
Týyrlyqty shom qylyp,
Qyldan buıda estirip,
Tobylǵy muryndyq jondyryp,
Aq samaıly ájeni,
Nar ústine qondyryp,
Saparymyzdy oń buryp,
Jaılaýǵa kóshken el edik.
Arǵy jyldar sirikti taýda qoı baǵyp,
Qoı kúıisimen oılanyp,
Segiz órim qamshy alyp,
Jotaly jonnan ań shalyp,
Jortýyldap jon kezip,
Bóri soǵyp qanshalyq,
Qanjyǵamyz qan sasyp,
Aıýdan ishik jamylyp,
Momyndyǵynan jańylyp,
Kórmegen qońyr el edik.
Arǵy jyldar arqan tilip talystan,
Shalma tastap alystan,
Órmesi segiz taspaly,
Seskendiretin basqany,
Er astyna arqan sap,
Taqymnan serke laqtyryp,
Serilikpen tań attyryp,
Betegeli belderge,
Bes túligin baqtyryp,
Erkin óskn el edik.
Arǵy jyldar ataly sózge des berip,
Alqaly topty eskerip,
Samaıyn shalǵan aq qyraý,
Saqaldy qarttan seskenip,
Qońyr kóńili qozdaǵan,
Dala tilinde bozdaǵan,
Qobyzdyń úni tym izgi,
Sananyń syryn sapyryp,
Sarnaǵan sazdy sybyzǵy,
Saǵym jyldardy eske alyp,
Sapyryp ishken qymyzdy,
Salıqaly el edik.
Bergi jyldar beri qaıtty kóshimiz,
Jotaly jonda josyp iz,
Birimiz sál-pál qınalyp,
Birimiz nurly buıda alyp,
Saıası uly kóshke erip,
Bárimiz sony qosh kórip,
Altaıda biriń alańdap,
Arǵy taýda balań qap,
Senimin júktep arqaǵa,
Tarıh teńin teńdegen,
Kósh keldi Saryarqaǵa,
Qosh keldiń uly mereke,
Tarqama shattyq tarqama...
Dúrginbaıuly Qyzyrbek – 1990 jyly dúnıege kelgen. Shyǵys Qazaqstan memlekettik ýnıversıtetiniń Fılologıa fakúltetiniń túlegi. Qazir Óskemen qalasyndaǵy O.Bókeı atyndaǵy qalalyq kitaphana qyzmetkeri.
