Almaty oblysynda aty-jóni belgisiz jandar kómiletin beıitte marqumdar durys jerlenbeı, tabyttar syrtqa shyǵyp qalǵan. Mundaı soraqylyqqa nalyǵan zıarat etýshiler tabyt ishindegi máıitti qańǵyǵan ıt tartqylap, kún ysyǵanda túrli aýrý taraýy múmkin dep qaýiptenedi, dep habarlaıdy Qamshy.kz aqparat agenttigi KTK arnasynyń deregin negizge ala otyryp.

Al, marqumdardy jerleý rásimi tender arqyly júrgiziletinin aıtqan ákimdiktegiler, jylyna 2 mılllıon teńge bólinetin jumystan ketken olqylyqty endi ózderi atqarýǵa májbúr eken.

Qorymdaǵy kórinisten deneń túrshigip, aza boıyń qaza bolady. Ońdy-soldy kómilgen tabyttardyń sheti kórinip, ashyq-shashyq jatyr. Qaraıǵan qorshaýy da joq. Ókinishtisi, beıittegi  beıbereketsizdikti quzyrly oryndar emes, áýeli zıarat etýshiler baıqaǵan. 

"Memlekettik búdjetten qansha aqsha bólinse de, adam sekildi jerleı almaǵan. Mańaıda jurt bar, balalar oınap júr. Qańǵyǵan kez kelgen qazyp alýy da ǵajam emes. Tabyt topyraqtan ashyq jatyr, qalǵan jeri 10-15 santımetr tereńdikte kómilgen", — deıdi Evgenıı Dágılev.

"Shyndyǵynda moraldyq turǵydan alsaq, adamgershilikten jurdaı jandardyń áreketi der edim. Qaıtkende de zıratqa qaraıtyn jaýapty mekeme bolýy kerek qoı. Biraq, biz jan-jaqqa habarlasyp, eshkimdi tappadyq", — dep keıidi  Anjelıka  Ahmedova.

Mejdýrechensk aýyldyq okrýgindegi arnaıy jerleý orny  5 jyl buryn ashylǵan. Taǵdyrdyń jazýymen osy zırattan topyraq buıyrǵandar, aldyn-ala qazylǵan shuńqyrǵa jerlenedi. Al, beıit basyna jınalǵandar,  árýaqty qorlaǵandar jazasyn alýy tıis dep esepteıdi. Biraq, jergilikti ákimdiktegiler, bar kináni tabıǵattyń tosyn minezine artyp qoıdy.   

"Ózderińiz bilesizder, qazir kóktem mezgili. Qar jaýady, jańbyr jaýady, jer otyrady. Ózimizdiń ákimdik tarapynan mamandar kelip, qarap turady. İstegen jumysyna qaraı aqshasyn berip turamyz", — dep túsindirdi Mejdýrechensk aýyldyq okrýginiń ákimi Serik Ábdibekov. 

Talap boıynsha tenderden jeńimpaz atanǵan jeke kompanıa marqumdardy jerleý rásimin iske asyryp kelipti. Oǵan jylyna baqandaı 2 mıllıon teńge bólinip otyrǵan. 

Qorymǵa tek İle aýdanyndaǵy máıithanalardan jetkiziletin aty-jóni belgisiz jandar jerlenedi. Jylyna orta eseppen 30-ǵa jýyq adam jer qoınyna tapsyrylady. Biraq, mańaıdaǵy turǵyndar tabyty kórinip, ashyq-shashyq qorymnan kún ysyǵanda túrli aýrý taraı ma dep qorqady. Al, tenderden utyp, is bitti, qý kettiniń kerin keltirgen kompanıaǵa shara qoldana almaımyz degen ákimdiktegiler, endi marqumdardy qaıta kómý jumysyn óz moıyndaryna alatynyn aıtty.