Qazaqstan Respýblıkasy Parlamenti Senatynyń Tóraǵasy Q.K.Toqaevqa Ashyq hat

Qurmetti, Qasym-Jomart Kemeluly!

Ózińiz jaqsy bilesiz, atam qazaqta «Jaqsynyń jaqsylyǵyn aıt, nury tasysyn. Jamannyń jamandyǵyn aıt, quty qashsyn!» degen keremet sóz bar. Basqany bylaı qoıǵanda, Sizdiń Syrqy İster mınıstri, QR Premer-mınıstri bolǵan jyldaryńyzda Elbasy jolǵa qoıǵan Kóshi-qon saıasatynyń durys júrgizilýine, alystan keletin qandastarymyzdyń shetelden vıza rásimdeý, elimizge kelip qujattaný jaǵynda sińirgen eńbegińizdi biz bul kúnde saǵyna eske alamyz, aýzymyzdyń sýy quryp aıtyp júremiz. Sizdiń kásibı dıplomattyǵyńyzdyń, qytaı tiline jettiktigińizdiń arqasynda, kóp kedergiler sheshilip, Shyńjańdaǵy etnıkalyq qazaqtardyń Atajurtqa oralýyna jaqsy jaǵdaı jasaldy, dańǵyl jol ashyldy... Tipti, sol elde týyp ósken, oqyǵan bizdiń ózimiz Sizdiń «Belasaý» kitabyńyzdyń «Aspan astyndaǵy daýyl» atty taraýyn oqyǵanda baryp, Qytaıdyń bizge qupıa bolyp kelgen kóp syryn bildik qoı! Úkimet basyna K.Másimov qalaı keldi, aǵylyp jatqan Uly kósh dárıasy solaı sýala bastady. Kele salyp, 1992 jyly 23-qyrkúıekte qabyldanǵan «Shetelderdegi qazaq dıasporasy ókilderiniń Qazaqstan Respýblıkasynda bolǵan kezinde áleýmettik-ekonomıkalyq jeńildiktermen qamtamasyz etý týraly» №791 qaýlysynyń kúshin joıdy. Úkimet jaǵynan ár jyly 20 myń otbasyǵa dep bólinip kele jatqan kvotany pyshaqpen qıǵandaı toqtatty. Jańaózenniń jalasyn túgelimen oralmandarǵa japty. Jaqtastaryn Londonǵa deıin júgirtip, qandastarymyzdy qaralatty. 2012 jyly 28 naýryzda №362 Qaýly qabyldap, «Sottylyǵy» jáne «Shyǵý paraǵy» degen páleni oılap tapty. 2011 jyldyń 22 shildesinde Prezıdent qol qoıǵan, 16 tamyzdan bastap resmı qoldanysqa engen №478 «Qazaqstan Respýblıkasynyń keıbir zańnamalyq aktilerine Hlyqtyń kóshi-qony máseleleri boıynsha ózgerister men tolyqtyrýlar engizý týraly» QR Zańynda: «Sondaı-aq Qazaqstan aýmaǵynan ketken adamdar men olardyń urpaqtarynan, eger olar tarıhı Otany retinde turaqty turý úshin Qazaqstan Respýblıkasyna qaıtyp oralǵan bolsa» degen batpandaı bapty jol ortadan alyp tastaǵanyn aldyńǵy maqalamda aıtqanmyn. Keıin Qazaqstan halqy Assambleıasynyń kezekti bir jınalysynda Elbasyǵa jazýshy Smaǵul Elýbaı arqyly aıtqyzyp, «túsip qalǵan» mátindi 17 kúnde qaıta qalpyna keltirttik... Qaısy halyq ekeni qapelimde esime túspeı otyr, semiz buqanyń arqasyna atpen kelip, naıza suǵyp oınaıtyn; qansyrap jatqan janýardy kórip, máz bolatyn; lázzat alatyn bir ult bolýshy edi ǵoı. Myna K.Másimov ta quddy sol sekildi, shetten keletin qandastarymyzdyń aldyna alynbas qamaldardy qoıyp, qujattana almaı shýlap, jylap- eńirep júrgenin kórip jany sodan toıat tabatyn, rahattanatyn, ishteı máz bolatyn kórinedi. Júz jasaǵyr ardaqty Nursultan Ábishuly «Qandastarymyzǵa jol ashýymyz kerek. Qazaqtyń jeri keń. Ornalasamyn degen jerin ózi tańdasyn!» dep, Qazaq kóshin burynǵy arnasyna salmaq bolyp, tapsyrma berýin ǵoı, berdi! Sol zań jobasyn qazir Májilis talqylap jatyr. Alla qalasa, jaqynda Senatqa da barady. Biraq, ana  EKİ ANYQTAMA bul Zań aıasynda emes, tek Úkimet qaýlysy arqyly kúshin joıady ne ózgertiledi eken. Bes birdeı senator hat ta jazdy, Kárim Qajymqanuly ózgerpeı, áli qasarysyp otyr. Eger, osy eki kedergi alynbaı, bes álde onynshy márte qaıtalaýym shyǵar bul, qos palatanyń maquldaǵan zańynyń quny kók tıyn bolmaq! Sizderdiń esil eńbekterińiz selge ketpek!! Elbasymyzdyń tapsyrmasy dalada qalmaq!!! Osy №111 Qaýlydaǵy EKİ ANYQTAMA qujatty shetelge shyǵatyn azamattaryna Qytaı úkimetiniń bermeıtinin, ol týraly arnaıy qabyldanǵan Zań-erejeleriniń bar ekenin K.Másimov óte jaqsy biledi. Biraq, órgertýge, qazaqtardyń kelýine jol ashýǵa tym yntaly emes. Jáne de sol Ult Kóshbasshysy N.Nazarbaevty qazaqqa qarsy qoıǵysy keledi. Alystaǵy aǵaıyndy Atajurtyna oraltqysy joq! Qazaqtyń sanynyń kóbeıýin jany qalamaıdy. Odan ózge sebebi joq!!! Sonda, bul jigit bir emes, eki márte Úkimet basyna ákelgen bildeı Prezıdentti tyńydamaıtyn, aıamaıtyn, «Qandastarymyzǵa jol ashýymyz kerek!» degen tapsyrmasyn oryndamaıtyn bolǵany ma?! Qaıda álgi «Sizdiń adal kómekshińiz bolǵanmyn, qazir de solaı, bolashaqta da bolyp qala beremin!» degeni?!! Sondaǵy «Adaldyǵynyń» túri osy ma??! Mudaı aldamkóstikke ne daýa ózi?! Ýájderine qaraǵanda, Úkimet «EKİ ANYQTAMA» qujatty shetten keletin qandastarymyzdan «Memlekettik jáne qoǵamdyq qaýipsizdikti qamtamasyz etý maqsatyna» talap etip otyr eken. Táýelsiz Qazaqstannyń tarıhynda Úkimet basqarǵan jalǵyz K.Másimov emes! Alashtyń aımańdaı uldary kezek-kezegimen bul salany urshyqsha úıirgenin biz jaqsy bilemiz. Sonaý S.Tereshenko(1991-1994), Á.Qajygeldın(1994-1997), N.Balǵymbaevtardan(1997-1999) bastap, Qasym-Jomart Kemeluly(1999-2002), Ózińiz, keshegi Imanǵalı Tasmaǵambetov (28.01.2002-11.06.2003) pen D.Ahmetovke(2003-2007) deıin alys-jaqyn shetelderden typ-tynysh, jym-jyrt kelip Qazaqstan aýmaǵyna qonystanyp jatqan oralmandar, búgin K.Másimov Úkimet basyna kelgende, aıaq-astynan ATA JAÝ bolyp shyǵa kelgeni me??! Qazaq Eliniń «Memlekettik jáne qoǵamdyq qaýipsizdigin» búldire qoıyp pa?!! Aıtyńyzshy, Siz óz qandastaryńyzdy osynshama qorlatýǵa, aryn taptatýǵa qalaı shydap tura alasyz!?? Dana Nurekeń qandastaryn bolashaqtaǵy sol «Memlekettik jáne qoǵamdyq qaýipsizdikti» saqtaý maqsatynda shaqyryp otyrǵan joq pa?!! Shette tarydaı shashyrap júrgen qandastarymyzdyń ultaralyq dostyq pen qoǵamdyq tynyshtyqty saqtaýdaǵy saýattylyǵy men eńbegine, tipti, Elbasymyzdyń ózi dán rıza! Senbeseńiz, myna vıdıo-jazbany kórińiz. Sol qazaqtar sol deńgeıinen joǵarlamasa, esh tómendegen joq áli. Mine, merziminen buryn Prezıdent saılaýyn ótkizý týraly usynys aıtylyp jatyr. Sonda turaqty tirkeýge tura almaı ne azamattyqqa qoly jetpeı, qandastarymyz taǵy shýlap júrse, Elbasymyzdan uıat emes pe?! K.Másimov shimirikpegenimen, uıattyń otynan bizdiń betimiz kúıip barady...

Sondyqtan, qurmetti Qasym-Jomart Kemeluly, Sizden ótinerimiz bireý-aq: Myna «QYTAI HALYQ RESPÝBLIKASY TÓLQUJAT BERÝ TÁRTİBİ» men «QYTAI HALYQ RESPÝBLIKASYŃ AZAMATTYQ TÝRALY ZAŃYNYN» oqyp, ana «aqymaq» baýyryńyzǵa jazbasha túsindirip berseńiz ǵana bolǵany!

Eskertý: Qytaı zańynyń kóshirmesin Sizge hatpen arnaıy jiberem!

Aýyt Muqıbek, aqyn

24.02.2015 Astana