Túrkistan qalasynda «Áziret Sultan» memlekettik tarıhı-mádenı qoryq-mýzeıiniń uıymdastyrýymen «Qazaq handarynyń jońǵar shapqynshylyǵyna qarsy azattyq soǵysyndaǵy róli» atty respýblıkalyq ǵylymı-tájirıbelik konferensıasy ótti, dep habarlaıdy Qamshy.kz aqparat agenttigi. 

 

Konferensıanyń negizgi maqsaty – Elbasy N.Á.Nazarbaevtyń «Bolashaqqa baǵdar: rýhanı jańǵyrý» baǵdarlamalyq maqalasy, Elordamyz Astana qalasynyń 20 jyldyǵy jáne Orbulaq shaıqasyndaǵy jeńiske 375 jyl tolýyna oraı babalardyń erligin ulyqtaý, jastardy patrıottyq rýhta tárbıeleý, kıeli jerlerdi keńinen tanytý, tarıhı-mádenı muralarymyzdy saqtaý, nasıhattaý arqyly keleshek urpaq kádesine jaratý, sonymen qatar túrki halyqtarynyń rýhanı piri Qoja Ahmet Iasaýı muralarynyń tarıhtaǵy orny jáne otandyq mýzeı salasyndaǵy aktýaldy problemalardy saraptaý, taldaýǵa arnalǵan. 

 

Konferensıa jumysyna «Qasıetti Qazaqstan» ǵylymı-zertteý ortalyǵynyń basshysy Berik Ábdiǵalıuly, «Áziret Sultan» qoryq-mýzeıiniń dırektory Nurbolat Ahmetjanov, QR Ulttyq mýzeıdiń aǵa ǵylymı qyzmetkeri Absemetova Jumakul, Q.A.Iasaýı atyndaǵy HQTÝ oqytýshysy, t.ǵ.d., profesor Tursyn Haziretáli, Qaraǵandy oblysy beıneleý óneri mýzeı dırektorynyń orynbasary Arshabekov Temirǵalı, «Abylaı han rezıdensıasy» mýzeıiniń dırektory Sadaev Aıan, Atyraý oblystyq tarıhı-ólketaný mýzeıi dırektorynyń orynbasary Gazımova Saıa, Sh.Ýálıhanov atyndaǵy mýzeı dırektory Kólibaev Ýálıhan, Ordabasy qoryq-mýzeıiniń Bas qor saqtaýshysy Kasımov Baqytjan, «Ejelgi Taraz» esekrtkishteri qoryq-mýzeıiniń aǵa ǵylymı qyzmetkeri Shildebaeva Jazıra, Qyzylorda oblysy, QR Ulttyq mýzeıiniń ǵylymı qyzmetkeri Kókebaev Darhan, Otyrar qoryq mýzeıiniń kishi ǵylymı qyzmetkeri Abdýhahıtov Erqoja, Ǵ.Muratbaev mýzeıiniń ǵylymı qyzmetkeri Jadyrasynova Altynaı, syndy tarıh, fılologıa, fılosofıa, shyǵystaný, mádenıettaný salalarynyń ǵalymdary men mamandary qatysty. 

 

«Áziret Sultan» qoryq-mýzeıiniń dırektory Nurbolat Ahmetjanov Orbulaq shaıqasyndaǵy jeńiske 375 jyl tolýyna oraı ótkizilgen konferensıa jumysyna sáttilik tiledi. «Qasıetti Qazaqstan» ǵylymı-zertteý ortalyǵynyń basshysy Berik Ábdiǵalıuly QR Mádenıet jáne sport mınıstri Arystanbek Muhamedıulynyń quttyqtaý hatyn oqyp berdi. 

 

Mınıstr quttyqtaý hatta "Osyndaı ózekti máselelerge arnalǵan basqosýlar el mádenıetiniń órkendeýi men tarıhı sanamyzdyń jańǵyrýyna ákeledi. 

 

Batyr babalarymyzdyń azattyq jolyndaǵy qaıratkerlik kúresterine arnalǵan búgingi konferensıa tól tarıhymyzdy tereńirek zertteýge, ulttyq biregeıligimizdi nyǵaıtýǵa septigin tıgizedi dep senemin"-dep, óz pikirin bildirgen.

 

Konferensıa barysynda «Kıeli jerler – ulttyq birlik pen jańǵyrý nyshany», «Orbulaq shaıqasy týraly derekter syr shertedi», «HÚİİİ ǵasyrdaǵy Qazaq handyǵynyń saıası-áleýmettik tarıhy», «Jońǵar handyǵynyń qazaq dalasyna jasaǵan joryqtary», «Jalańtós bahadúr», «Orbulaq shaıqasyndaǵy – Salqam Jáńgir» syndy baıandamalar oqyldy.