Qytaı tarapy Ońtústik Koreıa men KHDR basshylarynyń kezdesýinen oń nátıje kútedi. Bul týraly jumada QHR SİM-niń resmı ókili Hýa Chýnın málimdedi.

Búgin KHDR prezıdenti men Ońtústik Koreıa prezıdenti demarkasıalyq jelide kezdesti. Kım Chen Yn shekarany bólip turǵan syzyqty ótip, ońtústik aımaqqa attap basqan alǵashqy KHDR prezıdenti boldy.

«Biz búgin teledıdardan tarıhı sátke kýá boldyq. KHDR jáne Ońtústik Koreıa basshylary áskerı-demokratıalyq lınıany kesip ótip, bir-biriniń qoldaryn qysty. Biz eki taraptyń bul qadamdaryn qoldap, ony saıası batyldyqqa balaımyz. Búgingi tarıhı kezdesýdiń nátıjesi ońynan bolatynyna senimdimiz», - dedi brıfıń barysynda Hýa Chýnın.

Sonymen qatar Hýa Chýnınniń pikirinshe, bul kezdesý – Koreı túbegindegi tynyshtyq pen beıbitshiliktiń alǵashqy qadamy.   

Ótken aptada Kım Chen Yn KHDR ıadrolyq jáne zymyrandyq synaqtardy 21 sáýirden bastap toqtatty dep málimdedi.

Sonymen qatar Phenán ıadrolyq qarýdy qoldanýdan bas tartty. Jáne de Soltústik Koreıa ıadrolyq tehnologıalardy basqa memleketterge bermeýge ýáde berdi.

Ońtústik jáne Soltústik Koreıa arasyndaǵy qarym-qatynastardyń jaqsarýy Ońtústik Koreıanyń Phenchhandaǵy Olımpıadaǵa daıyndyǵy barysynda boldy.  Soltústik Koreıa sportshylarynyń Olımpıada oıyndaryna qatysýy, sondaı-aq Ońtústik Koreıaǵa Kım Chen Ynnyń ápkesi men Ońtústik Koreıa prezıdentiniń arnaıy ókilderiniń KHDR-ǵa sapary áser etti.