Pavlodar oblysynda turǵyndar Ertis ózeniniń jaǵasynan 300 jyldyq adam basynyń qańqasyn taýyp aldy, dep habarlaıdy Qamshy.kz aqparat agenttigi Tengrinews.kz saıtyna silteme jasaı otyryp.
Kýágerler qańqa tabylǵan jerdiń sýretterin áleýmettik jelilerde bólisti. Aqqý aýylynyń turǵynynyń aıtýynsha, bas qańqasynan da bólek ol jerde súıekterdiń bólikteri de jatqan.
Aýyl ákimdigi málimdegendeı, tabylǵan adam qańqasy 18 ǵasyrda kómilgen. Qańqa tabylǵan jerge jaqyn mańda eski pravoslavtyq zırattar ornalasqan eken.
«Bizde 300 jyl buryn kómilgen adamnyń qańqasy bar. Jyl saıyn ózen jaǵasyn sý shaıyp ótip, saldarynan adamdardyń qańqasy jaǵaǵa shyǵyp qalady. Qazir jaǵalaýǵa jaqyndap barý múmkin emes, sý deńgeıi óte joǵary kóterilip ketken, jartastardyń qulap ketý qaýipi bar. Sý deńgeıi tómendegennen keıin tabylǵan adam qańqalaryn jınap, qaıtadan kómip tastaımyz», - dedi Lebájınsk aýyldyq okrýginiń ákimi E.Baltabaev.
Onyń aıtýynsha, tabylǵan adam basynyń qańqasy men súıekterin Aqqý aýylyndaǵy zırattardyń birine kómedi eken.
«Bizde kóne adam qańqalaryn qaıtadan kómetin zırat bar. Ol tolyǵymen qorshalǵan, adam qańqalaryn qaıtadan kómýge azdaǵan oryn bar. Jyl saıyn mundaı jumystardy atqaryp otyramyz, jaǵdaı únemi baqylaýda. 2015 jyly eski zırattyń ornynda arheologtar jumys istegen. Bul zırat 18 ǵasyrda paıda bolǵan degen boljam bar», - dep atap ótti ákim.
Aqqý aýylynyń turǵyndary sońǵy ret adam qańqalaryn 2016 jyly taýyp alǵan. Ákimdiktiń málimetinshe, ol kezde bes adam jerlengen oryndar tabylǵan. Aıta keteıik, turǵyndar adam qańqalaryn 1990 jyldan taba bastaǵan. 2014 jyldyń jazynan bastap bul jerde adam qańqalary men bas súıeginen basqa jerlengen oryndar men aǵashtan kesilgen palýbalar da tabylǵan.
