«Qazaqstan» telearnasynda kórsetiletin «Kelin» úndi telehıkaıasynyń basty rólderiniń biri, Shıva rólin somdaýshy (basty rólderdiń biri - Anandıdiń kúıeýi) Sıdhart Shýkhla 27 aqpan - 2  naýryz aralyǵynda Astana qalasyna keldi. Sıdhart Astanaǵa anasymen keldi. Rıtoı Shýhla sonymen qosa  Sıdhardtyń agenti bolyp tabylady.

Astana halyqaralyq áýejaıynda Sıdhartty «Qazaqstan» telearnasynyń tanymal júrgizýshileri Nurlan Qoıanbaev, Láılá Sultanqyzy qarsy aldy.

Óziniń sýretteri men baspasóz betterinde jaryq kórgen maqalalaryn kórip, qazaqstandyqtardyń arasynda asa tanymal ekenine shyn kóńilden tań qalǵanyn jasyrmady.

Sıdharttyń aıtýynsha, Mýmbaıdan shyqqanda aýa temperatýrasy +30 gradýs bolǵan eken. Astanada biraz tońǵanyn jasyrmady. Soǵan qaramastan, qazaq halqynyń qonaqjaılyǵy daladaǵy aıazdy qolmen julyp alǵandaı. Sonymen qosa, elordanyń záýlim ǵımarattary men qalyń qarlary Sıdhartqa erekshe áser etken kórinedi. Sebebi, ol qys mezgilinde shańǵy sportymen aınalysqandy unatatynyn jasyrmady.

28 aqpan, senbi kúni, saǵat 15.00-de «Han shatyr» saýda-oıyn saýyqtyrý ortalyǵynda akter kórermendermen kezdesip, aftograf-sessıa ótkizdi. Aktermen kezdesýge «Han shatyrǵa» 23 myńnan astam adam keldi.

Sıdhart Shýkhla Mýmbaıda dúnıege kelgen. 34 jasta. 2008 jyldan beri akter sheberligin shyńdap keledi. Budan buryn sán bıznesinde qyzmet atqarǵan. Syrtqy kelbeti, boıy (188 sm.) da bul qyzmetke saı keledi. «Juldyzdarmen bı bıleý» shoýyna qatysqan. Ústel tenısimen jáne fýtbolmen shuǵyldanady. 2013 jyly Úndiniń Televızıa Akademıasy Sıdhartqa «Jyl ártisi» ataǵyn bergen bolatyn. Sol jyly jyl saıynǵy «Zee Gold Awards» TV syılyǵynyń nusqasy boıynsha ol eń «deneli» akter atandy. Úndiniń «Stardust» kıno týraly jýrnaly 2014 jyly ony kınoındýstrıad  aǵy «Úmit kútetin jas akterlerdiń biri» dep baǵalaǵan bolatyn. Al Úndiniń jyl saıynǵy «Filmfare Awards» kınosyılyǵy úndi tilinde túsirilgen fılmderdegi jetistikteri úshin Sıdhartty «Erler debúti-2015» syılyǵyna usyndy. Qazirgi ýaqytta Sıdhart úndiniń belgili prodúseri Karan Djoharmen úsh fılmge túsý úshin shartqa qol qoıdy.