Polısıa qyzmetkerleri «Saıahat» avtovokzaly aýmaǵynda kólik astyna túsken almatylyq qyzdyń aryzy boıynsha reıd júrgizdi. Almaty İİD bergen habarlamaǵa súıensek, qyzdyń polıseılerge aıtqan aqparaty rastalmaı shyqty.
«Bıylǵy jyldyń 1 mamyrynda sotqa deıingi tergeý júrgizý kezeńinde İİD uıymdasqan qylmyspen kúres basqarmasynyń basshylyǵy múddeli qoǵamdyq uıymdardyń ókilderi jáne quqyq qorǵaýshylarmen birge aryzdanýshy ózin kúshtep ustady dep kórsetken mekenjaıda reıd júrgizdi. Aqparat rastalǵan joq, kórshilerdiń aıtýynsha, bul mekenjaıda kishkentaı balalary bar otbasy turady», - dep jazyldy Almaty İİD habarlamasynda.
Aıta keteıik, mamyrdyń basynda saıtymyzda seks-quldyqtan qashyp shyǵyp, bazardaǵy halyqtan kómek suraǵan qyzdyń vıdeosy jarıalanǵan edi.
Qyzdyń aıtýynsha, 2018 jyldyń 6 mamyrynda saǵat shamamen 18.00-de Almaty qalasyndaǵy Súıinbaı dańǵylynda ony avtokólik qaǵyp ketedi. Keıin bireýler ony zańsyz ustap, jezókshelikpen aınalysýǵa májbúrlegen. Al tergeý jumystaryna sáıkes, N. esimdi almatylyq boıjetken 2009 jyldan beri jezókshelikpen aınalysqan tulǵa retinde uıymdasqan qylmyspen kúres basqarmasynyń qylmystyq esebinde turǵany anqytalady. Buǵan qosa, onyń jezókshelikpen aınalysatyndardy jáne olarǵa qyzmet etetin prıtondar men oryndardy anyqtap, joıý maqsatynda júrgizilgen jedel-profılaktıkalyq sharalar men reıdterdiń nátıjesinde ishki ister organdaryna jetkizilgeni belgili boldy.
Qazirgi tańda tergeý basqarmasy, sondaı-aq uıymdasqan qylmyspen kúres basqarmasy istiń naqty mán-jaıyn jáne keltirilgen málimetterdiń ras-ótirigin anyqtaý boıynsha keshendi shuǵyl jáne tergeý sharalaryn júrgizip jatyr. Zardap shegýshi «kýágerlerdi qorǵaý» baǵdarlamasy boıynsha kúzetke alyndy.
