Qazaqstan Respýblıkasy Densaýlyq saqtaý mınıstrliginiń Qoǵamdyq densaýlyq saqtaý komıtetiniń tóraǵasy - Qazaqstan Respýblıkasynyń Bas memlekettik sanıtarıalyq dárigeri Jandarbek Bekshın Almatyda menıngokoktan qaıtys bolý oqıǵalaryna qatysty túsinik berdi, - dep habarlaıdy Tengrinews.kz.
"Menıngıtti qozdyratyn neisseria meningitidis árdaıym kópshilik orynda taralady, al qazirgi turaqsyz aýa raıy, salqyn kúnder bakterıanyń taralýyna sebepshi bolyp otyr. (...) Biz Almatydaǵy epıdemıologıalyq aýrýdy tirkep otyrmyz. Bul - maýsymdyq aýrý. Ol kóbinese sýyq kezderde bolady, kóktemde, ımýnıtet álsiz kezde. Almatydaǵy aýrý-syrqaý tolqyn tárizdi sıkldik sıpatqa ıe bolyp tur", - dedi Bekshın jýrnalıserdiń suraqtaryna jaýap berip.
Onyń aıtýynsha, 2013 jyly 49 oqıǵa tirkelgen, 2015 - 66 oqıǵa, al eń kóp tirkelgen jyl 2011 boldy, ol kezde Astana qalasynda 211 adam aýyrǵan.
"Qazirgi tańda Almatyda menıngıtke shaldyǵýdyń 29 oqıǵasy tirkeldi jáne olar zerthanalyq negizde rastalǵan. Qazir biz epıdemıaǵa qarsy sharalardy júrgizip jatyrmyz - mádenı-kópshilik sharalarǵa shekteý qoıdyq, ásirese jabyq ǵımarattarda. Búgingi tańda mektepterdegi sabaq aıaqtaldy, ol da jaǵymdy áser etedi. Bakterıalar úshin eń qaýipti nárse - kúnniń sáýlesi jáne biz kún ysyǵannan keıin aýrýdyń beti qaıtady dep oılap otyrmyz. Sonymen qatar, balabaqshalarda profılaktıkalyq sharalardy júrgizip jatyrmyz - fıltrler ornattyq", - dedi Bas dáriger.
Bekshınniń aıtýynsha, sýyq tıgen jaǵdaıda birden emdelip, profılaktıka jasaý qajet.
"Mundaı jaǵdaıda ǵımarattyń ishindegi aýany tazartyp, dezınfeksıalyq zattardyń kómegimen ylǵaldy tazalyq jumysyn júrgizýge keńes beremiz. Bul sanıtarlyq-epıdemıaǵa qarsy sharalar aýrý-syrqaýdy retteýge jol beredi. Eń bastysy, nazofarengıt, sýyq tıý belgileri bar naýqastar birden medısınalyq qyzmetkerlerge barýy kerek. Dertten qaıtys bolǵandardyń barlyǵy dárigerlerge kesh barǵandar", - dedi Bekshın.
Eske sala keteıik, 21 mamyrda bul dert 15 adamda anyqtalǵan edi. Jalpy úsh adam qaıtys boldy - eki eresek adam men bir bala. Keıin Almatyda menıngokok ınfeksıasynan 1-kýrs stýdentiniń qaıtys bolǵany anyqtaldy.
Menıngokok ınfeksıasy - ınfeksıalyq juqpaly aýrý, ol túrli klınıkalyq belgilermen bakterıalar arqyly paıda bolady - taratýshyda belgileri bilinbeıtin bolýy da múmkin nemese nazofarıngıtten (muryn-jutqynshaq qabynýy), menıngıtten (mı qabyǵynyń qabynýy) bolýy múmkin. Infeksıanyń kózi - aýrý adamdar jáne deni saý taratýshylar.
