Shymkent garnızony áskerı soty 20030 áskerı bóliminiń áskerı qyzmetkeri podpolkovnık S.Rejepov óz qyzmettik ókilettigin asyra paıdalanǵanyn, aýyr zardaptarǵa ákep soqtyrǵan zańsyz kúresti uıymdastyrǵany úshin aıypty dep tanyldy.

Oǵan 6 jyl merzimge bas bostandyǵynan aıyrý jazasy úkim negizinde taǵaıyndaldy, dep habarlady sottyń baspaóz qyzmeti Qazaqstan jańalyqtary. Qaıǵyly oqıǵa 2013 jyldyń qarasha aıynda 20030 áskerı bólimine qarasty BBB "Arnaıy jasaq" bazasynda, kelisimshart qyzmetiniń bos laýazymyna irikteý barysynda oryn aldy. 23-jasar O.Súleımenovti jekpe-jek ótkizý barysynda aýyr bas jaraqatyn alyp, es-tússiz jatty. Medısınalyq qyzmetkerlerdiń sońyna deıin járdem kórsetkenimen O.Súleımenov esine kelmeı aýrýhanada qaıtys boldy. Joǵaryda atap kórsetilgen úkimge sottalǵan S.Rejepovpen Qazaqstan Áskerı sotynyń qylmystyq ister jónindegi apelásıalyq sot alqasyna apelásıalyq shaǵym keltirgen. Qazaqstan Áskerı sotynyń qylmystyq ister jónindegi apelásıalyq sot alqasynyń qaýlysyna saı sottalǵan S.Rejepovke jaza retinde taǵaıyndalǵan 6 jyl merzimge bas bostandyǵynan aıyrý jazasy ózgerissiz qaldyrylyp, "podpolkovnık" sheninen aıyrylǵan. Úkimi 10 aqpan 2015 jyly zańdy kúshine engen.