Ata-anasynan aıyrylyp, óz-ózin óltirmek bolǵan, alaıda «111» jedel jelisiniń qymetkerleri qutqaryp qalǵan qazaqstandyq boıjetken depýtattar aldynda betperde kıip sóz sóıledi.

«Bizdiń «111» senim telefony 2017 jyly 104 balany sýısıdten qutqaryp qaldy. Sol balalardyń biri búgin osynda kelip, sóz sóıleýge ruqsat surady. Betperde kıgen qyz ne sebepti sondaı qadamǵa barǵanyn túsindirip bermek. Qulaq asýǵa mindettimiz, onyń sebebi kóp. Biz balalardy kıindirip, tamaqtandyramyz, tońsa jylytamyz ári sol jetkilikti dep oılaımyz. Bir biz balanyń jany bar ekenin umytyp ketemiz», - dedi Májilis depýtaty, balalardyń quqyǵyn qorǵaý ókili Zaǵıpa Balıeva.

«Bes jyl buryn ata-anamnan aıyrylyp, tátemniń qolyna óttim. Alǵashqy kúni ózge úıge, ózge tósekke jatqanda ata-anamnyń joqtyǵyn qatty sezindim. Ol kúnge deıin ata-anany joǵaltý degendi túsinbegen ekem. Ata-anasyz qalaı ómir súrýge bolady dep oıladym. Ári qaraı ómir súrgim kelmedi. Biraq týystarym maǵan demeý boldy, qoldady. Sol jyldary boı jettim, sabaǵym nasharlady, tipti oqymaı kettim desem de bolady. Qatty jalǵyzsyradym. Syrymdy kimmen bóliserimdi, muńymdy kimge shaǵarymdy bilmedim. Sóıtip sýısıd jaıly oıladym. Internetten buǵan qatysty túrli saıttardy oqydym, fılmder kórip, túrli óleńder tyńdadym», - dedi boıjetken.

Qyzdyń aıtýynsha, senim qyzmeti jaıly jarnama arqyly bilgen.

«Maǵan alǵashynda bári anonımdi túrde ótedi dep aıtqan. Operatormen baılanysyp, jaǵdaıymdy túsindirdim. Ol maǵan psıhologpen sóılesýge keńes berip, basqa jelige qosty. Negizi jaǵdaıymdy ashyp aıtqym kelmedi, sebebi meni túsinbeı qalatyndaı kórindi. Biraq mamandar meni tyńdap, menimen jumys isteýge daıyn boldy. Ata-anamnan  basqa da jaqyndarym bar ekenin túsindirdi. Kez kelgen ýaqytta senim telefonyna habarlasyp, jaǵdaıymdy aıtyp bere alatynymdy túsindirdi. Jaqyn týystarymmen aralasyp turýyma septigin tıgizdi. Sóıtip bárin táteme aıtyp berýge bekindim, aıtyp berdim de. Ol meni psıhologtyń qabyldaýyna jazyp qoıdy. Qazirgi ýaqytta biraz jeńildep qaldym. Meni eshkim túsinbeıdi degen oıdan aryldym. Dostarymmen syrlasyp turamyn. Olardyń meni qoldaıtynyna kózim jetti. Álemge basqasha kózqaraspen qaraıtyn boldym. Olar meni ólimnen qutqardy. Alǵysym sheksiz», - dedi betperdedegi boıjetken.