Búgingi qoǵamdaǵy asa mańyzdy másele Prezıdent saılaýy. Saıası naýqannyń elimiz úshin orny erekshe, buǵan óńirdegi jurtshylyq tarapynan belsendilik te jaman emes. Degenmen, mańyzdy saıası oqıǵaǵa degen jalpaq jurtshylyqtyń kózqarasy qandaı? Keshegi Astanada ótken «Nur Otan» partıasynyń kezekti XVI sezi barysynda Elbasy Nursultan Nazarbaev saılaý máselesine de nazar buryp, óz pikirin de jetkizgen bolatyn.
Shyndyǵynda, Prezıdent saılaýy Qazaqstan úshin taǵy bir taǵdyrly tarıhı naýqan. Al ondaı naýqannan ne utamyz? Buǵan qatysty Elbasy Nursultan Nazarbaev bylaı dep aıtyp qaldy: «Qazaq eli bir orynda tabandap turyp qalmaı, alǵa jyljýy kerek. Toqtap qalýǵa bolmaıdy. Toqtap qalǵan sý buzylady, bir orynda tabandasaq, arttaǵylar ozyp ketedi. Qazaqstan halqy Assambleıasynyń kezekten tys prezıdenttik saılaý ótkizý týraly bastamasy halyq tarapynan qyzý qoldaý tapqanyn bilip otyrsyzdar. Sanaýly kúnde maǵan osy másele jóninde myńdaǵan hattar kelip tústi. Quzyrly organdar bul bastamany el zańnamasyna sáıkes dep tapty. Sonymen, 26 sáýirde kezekten tys Prezıdent saılaýyn ótkizý týraly Jarlyǵym osyǵan jaýap boldy. Buny Otanymyzda beıbitshilik pen kelisimdi nyǵaıtýǵa, bizdiń baǵytymyzdy jalǵastyrýǵa degen jalpyhalyqtyq umtylys pen dálel dep bilýimiz kerek», - deıdi Elbasy.
Sosyn Memleket basshysy saıası mádenıeti bolmaǵan eldegi saılaýdyń saldaryna da toqtalǵan bolatyn. Shyndyǵynda, ondaı teris saıası saldarǵa mysal da az emes, tipti muny birqatar memlekettiń qazirgi ahýalynan baǵamdaýǵa bolady. Osyny alǵa tartqan Elbasy Nursultan Ábishuly óz pikirin bylaı ushtaıdy: «Sońǵy jyldary keıbir elderdiń azamattary eńbek etýdi umyta bastaǵandaı. Narazylyq sherýleri «sánge» aınala bastady. Adamdar mıtıńige shyǵýǵa kúndelikti jumysqa barǵandaı asyǵatyn boldy. Sebebi, sol úshin olarǵa arandatýshylar jalaqy tóleıtin boldy, kún saıyn. Osynyń saldarynan saılaý jurtty biriktiretin emes, baýyrlardy bóletin, aǵaıyndy arazdastyryp, bir-birine qarý kezendiretin boldy. Kóshedegi qarabaıyr saıasatshylyq pen tek «saılaýdan-saılaýǵa» deıin ómir súrý aqyldy eldiń joly emes. Elge qyzmet etý úshin emes, mansap úshin bılikke umtylý abyroı ápermeıdi. Muny bárimiz de kórip júrmiz», - dedi Nursultan Nazarbaev.
Osy rette Elbasy uly Abaıdyń úshinshi qara sózinde aıtylǵandy eske túsirip ótti.
«Abaı úshinshi qara sózinde bylaı deıdi: Úsh jylǵa bolys saılanady. Áýelgi jyly «seni biz saılamadyq pa?» dep eldiń buldanǵanyna jaýap berýmen kúni ótedi. Ekinshi jyly kandıdatpen, kelesi kandıdatpen ańdysyp kúni ótedi. Úshinshi jyly «taǵy da bolys bolyp qalýǵa múmkindik bolar ma eken?» deýmen kúni ótedi. Abaı «sonda nesi qaldy?» deıdi. Qandaı shyndyq! Júz jyl buryn aıtylyp ketken shyndyq - bul», - dedi Memleket basshysy. Elbasynyń paıymynsha, saılaý qur ánsheıin saılaý ótkizý úshin emes, eldi birlikke shaqyryp, jurtty eńbekke uıytý úshin bolsa sol ǵanıbet.
Al memleket jáne qoǵam qaıratkeri, akademık Kenjeǵalı Saǵadıevtyń paıymynsha, álemdik almaǵaıyptar zamanynda Qazaqstanǵa da tónýi yqtımal qaýipterdiń aldyn alyp, betin qaıtarý turǵysynan saılaý naýqany der ýaqytynda qamtylyp otyr.
«Nursultan Nazarbaev san synaqtardan abyroımen ótken Elbasy. Onyń basshylyǵymen Qazaq eli talaı asýlardan asty, bul babalar buryn júrmegen soqpaǵy kóp jol edi. Onyń qıyndyqtary da boldy. Biraq, Elbasy osynyń bárinen jol taýyp, qazirgi qıyndyqtardy de kezinde sezip, kórip otyr. Onyń aıǵaǵy «Nurly jol-bolashaqqa bastar jol» atty Jańa ekonomıkalyq saıasat. Ol keń baıtaq eldi mekenderimizdiń bir-birimen baılanysyn nyǵaıtyp, halqymyzǵa jańa tynys-tirshilik ákeletin saıasat. Ol jumyssyzdyqpen kúresýge qural bolý saıasaty. Eń bastysy, bizder burynǵydaı tek munaıǵa ǵana ıek artýdy qoıyp, ekonomıkanyń jańa qyrlary men múmkindikterine basymdyq beremiz. Syn saǵatynda tabylǵan utqyr sheshim. Osyny oryndaýdyń mańyzy zor. Bizderge qurǵaq sóz, jaıdaq uran emes, naqty is kerek. Onyń nátıjesin halyq kórýi kerek. Sonda ǵana «Nurly jol» bizderdi jańa belesterge shyǵara bilgen bereke joly dep aıtamyz», - deıdi Kenjeǵalı Saǵadıev.
Onyń aıtýynsha, Elbasynyń syndarly saıasaty arqasynda Qazaqstan halqy yntymaqty túrde tirshilik etip jatyr, Qazaq eli eshkimmen daýlaspaı, alys-jaqyn eldermen tatý kórshilikti tý ete bildi. «Al munyń bári Nursultan Nazarbaevty Qazaqstan Prezıdenttigine birden-bir laıyq qaıratker ekenin aıǵaqtaıdy. Elin sońyna ertip, halyqtyń asqaq armanyn úkilegen Elbasy - Nursultan Ábishuly bolsyn, qoldap el tizginin qolyna ustataıyq, sáttilik tileıik», - dedi akademık.
