Áıgili boksshy Maık Taıson qazaqstandyq Gennadıı Golovkındi ýkraınalyq Vasılıı Lomachenkodan tómen qoıdy.

Bul týraly Vesti.kz habarlaıdy. Taısonnyń aıtýynsha, Golovkın naǵyz "dóreki pancher". Alaıda, onyń Lomachenko sekildi senimdi qorǵanysy joq. Maık Taıson ýkraınalyq boksshy Vasılıı Lomachenkony Shyǵys Eýropanyń eń úzdik bokseri dedi. Ol ortasha salmaqta WBA (Super), WBC (Interim) jáne IBO tıtýldarynyń ıegeri qazaqstandyq Gennadıı Golovkınniń jetistikterine qaramastan, Lomachenkony óziniń shyǵys eýropalyq úzdik boksshylar reıtingisinde birinshi orynǵa qoıǵanyn jasyrmady. "Ol (Lomachenko) tarıhta absolútti túrde úzdik áýesqoı boksshylardyń rekordyn jańartty. Ol óte keremet! Jáne ol tóbelese alady saıtan alǵyr! Sonymen qatar, ol óte aqyldy boksshy. Eger meniń jattyqtyrýshym Kas D'Amato tiri bolǵanda, ol da bul jigitti joǵary baǵalar edi. Lomachenkonyń qorǵanysy minsiz. Al qorǵana bilý – boksta bıik tuǵyrlarda kórinýge qajetti eń alǵashqy qabilet. Shabýylda qorǵanys pen tamasha agresıa – ýkraınalyq boksshynyń osy qasıetteri meni tánti qyldy! Jáne sizder Golovkındi aıta bastaǵanda... Kovalevti aıta bastaǵanda… Iá, bul jigitter naǵyz pancherler. Olar qatygez! Biraq olarda Vasılııde bar qabilet joq. Ol – óte senimdi qorǵanys!", – degen Taısonnyń sózderin Lomachenkonyń saıty jarıalady. Búkilálemdik boks uıymynyń málimeti boıynsha, jartylaı jeńil salmaqtaǵy chempıon, 27 jastaǵy Lomachenko kásibı rıngte 3 ret jeńip, 1 ret jeńilis tapqan. Áýesqoı boksta ol 396 ret rıngke shyǵyp, tek bir ret jeńilgen. Boksshy sonymen qatar, London men Beıjińdeshi Olıpıada oıyndarynda altyn medal aldy. Salystyra ketsek, Gennadıı Golovkın kásibı boksta 32 ret rıngke shyǵyp, bárinde jeńiske jetken, onyń 29-ynda nokaýt jasaǵan. Munymen qosa, brıtandyq boksshy Martın Múrreıdi Monte-Karloda jeńgen Golovkın Maık Taısonnyń rekordyn qaıtalaǵan. Áýesqoı boksta Golovkın 350 ret sharshy alańǵa shyqqan.