Táýelsizdik alǵan jyldary Elbasynyń tike bastamasymen jolǵa qoıylǵan "Qazaq kóshi" bul kúnde qańtarylyp tur. Memleket basshysy san márte qaıtalap, "Kóshke kedergi jasalmasyn" desede, bázbireýler "Uly kóshtiń" jalǵasýyna aıtarlyqtaı kedergi keltirip otyr.
Mine, taǵy bir shý Aqmola obylysy, Zerendi aýdany, Qanaı bı aýylynan shyqty. Búgin-erteń dep eleńdep otyrǵan El prezıdentin saılaý naýqanyna Aqmolalyqtar "Oralman qamap" daıyndalyp jatyr.
2014 jyly shildede Saıipbaı Nurbol degen jigit otbasymen Atajurtqa kóship kelgen edi, kele sala sol jerde úsh jyldan beri turatyn Ábilmajyn Qurmanáliniń úıinde tirkeýge turǵan. Qujattaryn jınap, yqtıarhatyn aldyńǵy juma kúni 2015 jyly 6 naýryz alypty. Sóıtip, ótken jyldyń qarasha aıynda satyp alǵan jańa úıine endi tirkelemin be dep otyrǵanda Zerendi aýdanynan polısıa kelip, Nurboldy ala jónelgen. Ýájderi - azamat ózi tirkeýde turǵan úıde turýy kerek. Al myna Nurboldyń jańa satyp alǵan úıi tirkeýde turǵan úıinen 2 mınýttyq jerde ornalasqan. Yqtıarhatty jańa alǵanyn aıtyp, mán-jaıdy túsindirmek bolǵan qandasymyzdy álgi pagondylar sottan biraq shyǵarǵan. "Áı, qaıda júrsiń" deıtin emes, shaǵyn aýylda bar-joǵy 80-ge jýyq otbasy turady eken.
Sonymen, Nurbol Saıipbaıulyna "tirkeýde turǵan úıine turmaǵandyǵy" sebepti 80 myń teńge aıyppul salynyp, bir táýlikke qamaý jazasy buıyrylǵan.
Men jaǵdaıdy bilgennen keıin túski mezette sot júrgizip otyrǵan jerdegi poısıamen telefon arqyly habarlasqan edim. Ol "siz qaıda qońyraý shalsańyzda, kim bolsańyzda meıli, men tek zańdy atqaryp jatyrmyn" dep telefondy qoıa saldy.
Sóz túsinetin bir adam tabylar dep Qanaı bı aýylynyń ákimi Júsipov İlıas Amanjolulyna habarlasqanymda, "ıá, ol bizdiń aýlda turady, áıeli, eki balasy bar. Men aýyl ákimimin, ishki ister mekemesiniń sharýasyna aralaspaımyn" dep jaýabyn kelte qaıyrdy.
Sóıtip, eshkimnen deni saý jaýap ala almadyq. Shıetteı balasymen Nurboldyń áıeli otyr zar eńirep...
Bir tańǵalǵanymyz, Zerendi aýdanynyń İshki ister departamentinde otyrǵandar 26 sáýirde Qazaq elinde Prezıdent saılaýy ótetinin, oǵan "kelgen aǵaıynǵa barlyq jaǵdaıdy jasańdar" degen Elbasy Nursultan Nazarbaevtyń qatysatynyn bilmeıtin sıaqty.
Tym bolmasa osyndaı naýqandy kezeńde "Nurly kósh" avtorynyń qulaǵyn shýlatpasa kerek edi...
Aıatjan Ahmetjan
