Advokat Suńqar Nurmaǵambetov Aqjarqyn Turlybaıdyń isine qatysty qajet bolsa Qytaıǵa baratynyn aıtty. Zańger Aqjarqynmen jeke kezdesýge tyrysyp kórmek. Onyń aıtýynsha, ázirshe sottyń qashan ótetini belgisiz. Ýaqyt áli belgilenbegen.
- Qytaıda tergeý ızolátorynda jatqan otandasymyz Aqjarqyn Turlybaıdyń isine qatysty bizdiń pozısıamyz burynǵydaı - Aqjarqyn kinásiz. Sotta sony dáleldeýge tyrysamyz. Al sottyń qandaı sheshim shyǵarý múmkin ekenin boljap ta aıta almaımyn.
Buǵan deıin Qytaıdaǵy qazaqstandyq dıplomattar Aqjarqyn Turlybaıdyń jaǵdaıyn bilý úshin tergeý ızolátoryna baryp turatyny aıtyldy. QR SİM otandasymyzdyń densaýlyǵy turaqty ekeni habarlanǵan.
Eske sala keteıik, Aqjarqyn Turlybaı 2014 jyly Gýanchjoý áýejaıynda 4,5 keli esirtkimen áýejaıda ustalǵan. Qytaılyq sot bul qylmys úshin qyzdy ómir boıyna bas bostandyǵynan aıyrǵan. 2016 jyly appellásıalyq ınstansıa soty Aqjarqynǵa qatysty ómir boıyna bas bostandyǵynan aıyrý jazasynan bas tartyp, onyń isin birinshi ınstansıa sotyna jibergen. Birinshi ınstansıa sotynda A.Turlybaıdyń isi qaıta qaraldy. Qazirgi ýaqytta Aqjarqyn Turlybaı tergeý abaqtysynda sot úkimin kútip otyr.