DENIS TEN (13.06.1993 – 19.07.2018)
Búgin Qazaqstannyń talantty uly, betke ustar azamaty dúnıeden ozdy. Nebári 25 jasynda baqılyqqa attandy. Qazaqstannyń kók týyn shetelde jelbiretip, Qazaqstannyń namysyn qorǵaǵan chempıon endi aramyzda joq. Artynda jaqyndary, týystary, dostary, tileýlesteri men Qazaqstannyń sport tarıhyndaǵy óshpes izi qaldy.
«Denıs Tendi pyshaqtap ketti» degen habar taraǵanda, tezirek saýyǵyp ketýin tilep edik, alaıda máńgilikke aırylamyz degen oı bolmady. Kóp uzamaı, Denıstiń ómirden ozǵanyn estigende boıymyzdy muz qaryp ótkendeı boldy. Netken qatigezdik! Ádiletsizdik! Aıdyń-kúnniń amanynda, tapa-tal túste bir judyryq áınekke bola jap-jas jigittiń qyrshynnan qıylǵany qazaq halqynyń janyna batty.
Kishkentaıynan halyqtyń aldynda júrip, árqashan tek jeńisterimen qýantyp, qajyrly eńbek pen óz isine degen adaldyq, sheksiz mahabbat qandaı bolatynyn ispen dáleldep, kórsetip júrgen azamat edi. Qysqa ǵumyrynda kóp is tyndyrdy.
Denıs adamı qasıeti joǵary, zor jetistikterine qaramastan kishipeıildiligin, qarapaıymdylyǵyn saqtaı bilgen azamat. Bul tek mádenıeti joǵary adamnyń ǵana qolynan keledi.
Qazaq halqy adam tegine erekshe kóńil bóletin halyq. Tekti adamnyń urpaǵy da tekti bolmaq. Denıstiń jas bolsa da bas bola bilgeni onyń arǵy ata-babasynyń qanymen kelgen qasıet bolar. Denıs Koreı ımperıasy kezinde dańqty qolbasshysy bolǵan general Mın Gynhonyń urpaǵy.
1993 jyly 13 maýsymda Denıs esimdi Qazaqstannyń bolashaq jaryq juldyzy dúnıege kelgen edi. Nebári 13 jasynda Qazaqstan chempıonatynda jeńiske jetti. 2006 jyly halyqaralyq arenaǵa shyǵýǵa talaby men talanty jetip tursa da jasy jetpegen edi. Kishkentaı Denıs ózinen tájirıbelirek sportshylarmen báıgege túsýge daıyn bolǵany anyq. Eki jyldan keıin-aq Denıs jasóspirimder arasynda «Gran Prı» serıasy boıynsha ótken álem kýbogy kezeńinde 1 oryndy ıelendi.
2014 jyly Sochı olımpıadasynda qola júldege ıe boldy. Sochı olımpıadasynda Qazaqstan qorjynyna jalǵyz júldeni dál osy Denıs Ten alyp bergen bolatyn.
«Jigitke jeti óner de az» demekshi, Denıs mánerlep syrǵanaýdan bólek, tenıs, akrobatıka, taekvondo, karate, júzýmen aınalysqan. Bı jáne sýret salý mektebine barǵan.
Jan-jaqtylyǵymen, ónerimen talaıdy súısindirgen sportshyny búgin túski úshter shamasynda Almatyda Qurmanǵazy jáne Baıseıitova kósheleriniń qıylysynda pyshaqtap ketti.
Denıs dereý aýrýhanaǵa jetkizilgenimen dárigerler onyń ómirine arasha túse almady. Denıs kóp qan joǵaltqan eken. Adam ómiri úshin mańyzdy aǵzalaryna qatty zaqym kelip, sportshy o dúnıelik boldy.
Qazaq halqyn Denısteı ulynan aıyrǵan qylmyskerler óz jazasyn alady degen úmittemiz.
Muz aıdynynda qalyqtap, Qazaqstannyń namysyn abyroımen qorǵaǵan, kógildir muz hanzadasyna baqul bol deımiz. Bul tek bir otbasynyń ǵana emes, búkil Qazaqstan úshin ortaq qaıǵy. Barshańyzǵa qaıǵyra kóńil aıtamyz.
