Tanymal ánshi Dımash Qudaıbergenov qaıtys bolǵan Qazaqstannyń dańqty sportshysy Denıs Tenniń qazasyna qatysty pikir bildirdi, dep jazady Qamshy.kz aqparat agenttigi.

«Osyndaı qaıǵyly post jazamyn dep esh ýaqytta oılamadym. Buǵan sene alar emespin. Denıs, dosym, baýyrym. Biz seni qatty saǵynatyn bolamyz. Dostyǵyń úshin rahmet saǵan, Djekı! Sen uly adamsyń! Sen ańyz bolyp qaldyń! Jaryq dúnıeden erte ketkeniń qandaı ókinishti... Men árqashanda seniń talantyńa bas ıemin, ózińdi qatty saǵynatyn bolamyn. Ekeýmizdiń sońǵy sóılesken áńgimemizdi eshqashan umytpaımyn. Sen elimizdiń batyr azamatysyń!», – dep jazdy Dımash óz Instagram-paraqshasynda dosynan aırylyp qalǵanyn bilgen soń.

Keıinirek óz elinde óz qandasynyń qolynan qaza tapqan Denısten keshirim surap, taǵy bir jazba qaldyrdy.

«Qazaqtyń namysyn qorǵaımyn dep janyn salǵan, baryn salǵan maqtanyshymyzdy sol jerde bir qazaq kómektespek túgili, óz qazaǵymyzdyń qolynan jan tapsyrǵanyna sene alar emespin. Álemge bizdiń ultymyzdy ulyqtap, elimizdi tanytqan saýsaqpen sanarlyq maıtalmandarymyzdyń qadirin bilip qorǵap júrsek bolatyn edi ǵoı! Naǵyz erjúrek batyr ediń ǵoı, dosym. Seniń qarapaıymdylyǵyń, adamı qasıetteriń  bárimizge úlgi! Eki sózińniń birinde «Meniń Qazaqstanym», «Meniń qazaǵym» deýshi ediń. Meniń qanymdy, meniń ultymdy, meniń elimdi tanytqanyńa myń taǵzym. Sen eshqashan sónbeıtin juldyzsyń! Keshir  bizdi, dosym! Ózegim órtenip barady», - dep jazdy ánshi.  

Aıta keteıik, Qazaqstandyq chempıondy ury ári qandyqol qylmysker Qurmanǵazy men Báıseıitov kósheliriniń qıylysynda pyshaqtap ketken edi. Sonyń saldarynan Denıs 3 lıtrge jýyq qan joǵaltty. Dárigerler onyń ómirimen 2 saǵat boıy arpalysty, alaıda nátıjesiz boldy. Juldyz bir sátte sóndi de qaldy.