Kásipkerdiń aıtýynsha, aınany urlamaq bolǵan qylmyskerlerdi urlyq jazasy boıynsha qylmystyq iske tartý qajet, sebebi mundaı adamdar urlyqtyń kóbeıýine alyp keledi.

Qaırat Qudaıbergen Denıs Tendi óltirgen kúdiktimen oqıǵa ornynda qalaı soqtyǵysyp qalǵanyn baıandady. Bul jaıynda Qamshy.kz aqparat agenttigi BNews.kz saıtyna silteme jasap habarlaıdy.

«Búgin 11.30 shamasynda dosymmen birge Denıs Ten qaza tapqan jerge gúl shoqtaryn qoıýǵa kelgenbiz. Duǵa jasap, bir mınýt únsizdikten keıin qaıtýǵa jınaldyq, kenetten bir top polısıa qyzmetkerleri men prokýrorlar jáne chempıondy óltirgen qoly kisendeýli qylmysker kórindi. Ony oqıǵa ornyna alyp kelgen eken. Gúl shoqtaryn qoıýǵa kelgen halyq qylmyskerdi qarǵap-silep jatty: «Qanisher!», «Ólip qal!», «Sendeı adamdy jer qalaı júr!» degen sózder aıtyldy. Kúdikti qolyn betimen jaýyp, jylap kele jatty», - deıdi Qaırat Qudaıbergen.

Onyń aıtýynsha, tergeýshi kúdiktiden qylmystyń búge-shúgesine surap, tergeı bastady.

«Melısıa bolyp qyzmet atqarǵanda túrli qylmyskerlerdi kórgenmin. Aryqsha kelgen bul kúdikti jigit pyshaq suqqanda ne oılady eken? Adam óltirý jaıynda oılamaǵan bolý kerek. Alaıda árbir adam óziniń istegen isine jaýap berip, laıyqty jazasyn alýy tıis», - deıdi kásipker.

Onyń oıynsha, bul jigitter aldyn da osy syndy túrli qylmystar jasap, mundaı ispen aınalysyp júrgen.

«Meniń aıtarym – urlanǵan zattardy satyp alatyndardy jaýapqa tartyp, tıisti jazasyn berý kerek. Dál sol adamdar mundaı qylmystyń kóbeıýine yqpal etedi. Aınany 40 myń dep baǵalady. Denıs Tenniń ómiri 40 myń teńge bolǵany ma sonda?» - dep kúıinedi kásipker.