Elimizde 26 sáýirde ótetin kezekten tys Prezıdent saılaýyna "Juldyzdar otbasy" men "Ańyz Adam" jýrnaldarynyń bas redaktory Jarylqap Qalybaı myrzanyń qatysatyny týraly aqparatty "Qamshy" portalynda jazǵan edik. Bas redaktor Jarylqap myrza QR Prezıdenttigine úmitker retinde 12 naýryz kúni ótinish bergen. Ol memlekettik til synaqtaryn sátti tapsyryp, OSK-nyń lıngvısıkalyq komısıa múshelerin tań qaldyrǵan. Tipti, lıngvısıkalyq komısıa tóraǵasy Myrzataı Joldasbekovtyń ózi Jarylqap Qalybaıdyń Memleket basshysynan keıingi qazaq tilin jetik meńgergendigimen komısıa múshelerin tań qaldyrǵan ekinshi adam ekendigin aıtqan edi. Búginde qazaq tiliniń joǵyn-joqtap, muńyn-muńdap júrgen Jarylqap Qalybaı Ult janashyrlarynan kómek suraıdy. QR Prezıdent saılaý dodasyna ózin-ózi usynǵan Jarylqap Qalybaı myrzaǵa memlekettik synaqtardan súryinbeı ótkenimen az ǵana ýaqyttyń ishinde - 23 naýryzǵa deıin QR aýmaǵyndaǵy saılaýshylardyń 93 myń qolyn jınaý júktelgen. Al osy mejege jetý úshin Jarylqap Qalybaıdyń jaqtastary qyzý kirisip ketken sıaqty. Ol da jón. Áýebıkeshine "qazaqsha sóıle" degeni úshin basy daýǵa qalyp, Gıtlerdi "Ǵasyr qasireti" dep jazǵany úshin sotty bolǵan Jarylqap Qalybaıdy qarapaıym qazaq shyn syılaıtyny anyq. Sondyqtan bolsa kerek, Jarylqap myrzanyń ózi de jurtshylyqtan qoldaý surap hat jazypty:

"QURMETTİ ULT JANASHYRLARY

Men – «Juldyzdar otbasy» men «AŃYZ ADAM» jýrnaldarynyń bas redaktory Qazaqstan Respýblıkasy Prezıdenttigine úmitker retinde tirkeldim. El ishinde ultyma, memleketime qalaı qyzmet etsem dep júrgen ultjandy, memleketshil, oıly azamattar óte kóp. Meniń bul saılaý dodasyna qatysýdaǵy basty maqsatym – osy múmkindikti paıdalanyp, qarapaıym halyqtyń muń-muqtajy men talap-tilegin, sol oıly azamattardyń búgingi qoǵamdaǵy qordalanyp qalǵan problemalarǵa kózqarasy men ony sheshý joldaryn, bolashaqta Qazaqstan qandaı el bolýy kerek ekenin, kele jatqan daǵdarysqa qalaı qarsy turamyz, odan shyǵý joldary qandaı degen usynys-pikirlerin bılikke jetkizý. Sonymen qatar ult patrıottary men ultshyl azamattardyń ult múddesi úshin aldyna qoıǵan baǵyt-baǵdarlamasyn halyqqa jetkizý. Bul maqsatymdy júzege asyrý úshin 23 naýryzǵa deıin Qazaqstan Respýblıkasy aýmaǵyndaǵy saılaýshylardyń 93 myń qolyn jınaý qajet bolyp tur. Sol úshin ár oblystyń, aýdannyń, aýyldyń ultjandy azamattary osy sharaǵa bir kisideı atsalysýlaryn suraımyn" delingen hatta.

Árıne, Qazaqstan bıligin shırek ǵasyrdan beri ustap kele jatqan Prezıdent Nursultan Nazarbaevpen báskeles bolý qıyn. Degenmen, kez kelgen talantty qazaq urpaǵynyń óz elin basqarýǵa quqyqty, laıyqty ekenin árkez esten shyǵarmaǵan jón.

Nurgeldi Ábdiǵanıuly