Qazaqstanda otyzdan asa ákim men olardyń orynbasary para aldy degen kúdik bar. Bul jaıynda Qazaqstan Respýblıkasynyń Memlekettik qyzmet isteri jáne sybaılas jemqorlyqqa qarsy is-qımyl agenttiginiń baspasóz qyzmeti málimdedi.

Jyl basynan beri 31 ákim men olardyń orynbasarlary para alǵany úshin jaýapqa tartylǵan (oblystyki - 1, qala - 4, aýdan - 5, aýyl - 21). On ekisi sottalǵan.

Selınograd aýdanynyń burynǵy ákimine qatysty selsoqtyq tanytý deregi boıynsha tergeý bastalǵan. 

Sonymen qatar, Pavlodar oblysy Aqsý qalasy, Qalqaman aýyldyq okrýginiń ákimi bas mamanmen birigip, ákimdik ǵımaratyna tólem termınaldaryn qoıý boıynsha kelisimshart jasasý kezinde 50 myń teńge para aldy degen kúdikke ilindi.

Almaty oblysy Baıserke aýyldyq okrýgi ákiminiń burynǵy orynbasary qyzmetin asyra paıdalandy degen kúdik bar. Ol oblys turǵyndarynyń birine kólik turaǵyna arnalǵan jerdi zańsyz berip, memleketke 496 myń teńge shyǵyn keltirgen.

Bul derekter boıynsha sotqa deıingi tergeý júrip jatyr.

Atyraý oblysynda aýdan ákiminiń orynbasary men qurylys bóliminiń basshysy bopsalap, para alǵany úshin sottaldy. 

Aqmola oblysy Arshaly aýdany, Jibek Joly aýyldyq okrýginiń ákimi 300 myń teńge para alǵany úshin 23,4 mıllıon teńge aıyppul tóledi.

Jetisaı qalasynyń ákimi 200 myń teńge para alyp, 12 mıllıon teńge aıyppul tóledi.

Aqmola oblysy Selınograd aýdany, Qosshy aýyldyq okrýginiń ákimi 3 mıllıon teńge para alyp, 8,8 mıllıon teńge aıyppul arqalady.