Astana Reseıden Qytaıǵa tasmaldanatyn kógildir otyn tranzıtin Qazaqstan terıtorıasy arqyly ótkizýdi usyndy. Bul týraly "Qamshy" portaly "Kommersantqa" silteme jasaı otyryp habarlaıdy. "QazMunaıGaz" basshysy Saýat Myńbaev Reseıden Qytaıǵa tasymaldanatyn gazdy trýbany Qazaqstan Respýblıkasy terıtorıasy arqyly ótkizýdiń joldaryn kórsetti. Myńbaevtyń aıtýynsha, bul úshin qazirgi tańdaǵy Reseıden Qazaqstannyń ońtústigine kógildir otyn tasymaldanatyn "Buqara - Oral" jáne "Bozoı - Shymkent" magıstrallin qoldaný tıimdirek bolmaq. Sebebi, bular "Orta Azıa - Qytaı" gaz trýbalaryna qosylǵan. Al bul arqyly qazir Túrkimenstannan Qytaıǵa kógildir otyn tasymaldanýda. "Qazirgi tańda "Bozoı - Shymkent" kógildir otyn tasymaldaý magıstralderi asa iri kólemde gaz tasymaldaýǵa jaramsyz. Sebebi, atalmysh trýbalardyń qysymy tómen. Alaıda Qazaqstannan Orta Azıa jáne Qytaıǵa gaz tasymaldaý úshin "Bozoı - Shymkent trýbalarynyń qýattylyǵyn kompresorlyq stansıalar esebinen 2,5 mıllıardtan 10 mıllıard kýbmetrge deıin arttyrýǵa bolady. Qazir osy másele talqylanýda. Maquldanýy bek múmkin bul joba qolǵa alynsa, eshqandaı da jańa trýbalar emes, burynǵy joldar, ıaǵnı, Qazaqstan aýmaǵy arqyly erkin tasymaldaýǵa múmkindikter týady. Aldaǵy ýaqytta Reseı gazyn Qazaqstan arqyly Qytaıǵa tasymaldaý úshin biz atalmysh baǵytta shaǵyn kompresorlyq stansıalar ornatýdamyz. ",- deıdi "QazMunaıGaz" basshysy Saýat Myńbaev. Qazaqstannyń kótergen bastamasyna qatysty reseılik "Gazprom" qandaı da bir málimdeme bergen joq. Alaıda bul bastama Reseı úshin tıimsiz bolýy múmkin. Reseılik jáne qytaılyq sarapshylar gaz tasymaldaý isine Qazaqstannyń tranıttik zona retinde aralasýyna qarsy ekenderin bildirgen. Eske túsire keteıik, jaqynda "Gazprom" resmı túrde Pekınmen "Sıla Sıbırı" kógildir otyn tasymaldaý magıstraliniń qurylysyn bastaý týraly kelisimge kelgen edi. Atalmysh qurylys nátejıesinde Reseı gazy batys baǵyt, Altaı arqyly tikeleı Qytaıǵa jetkiziletin edi. Al byltyrǵy jyldyń jazynda Astana atalmysh baǵyttaǵy gaz trýbasynyń qurylysyn Astanadan ońtústikke qaraı, Qorǵas beketi arqyly Qytaıǵa tasymaldaýdy usynǵan bolatyn.
Nurgeldi Ábdiǵanıuly
