24 naýryz. Qamshy.kz - Búgin "Germanwings" áýe kompanıasyna tıesili A320 ushaǵy Fransıanyń Alpy taýynda apatqa ushyrady.  Sońǵy aqparattarǵa súıensek, Barselonadan - Dússeldorfqa baǵyt alǵan ushaqtyń bortynda  154 adam bolǵan. Sondaı-aq, 6 ekıpaj múshesi bar.

Atalmysh apatqa qatysty Fransıa prezıdenti Fransýa Olland: "Ázirge ushaqta bolǵandar týraly naqty aqparattar daıyn emes. Aldyn ala boljamdar boıynsha ushaq apatynan tiri qalǵandar bolmaýy múmkin. " Germanwings " kompanıasyna tıesili ushaqtyń bortynda Germanıa azamattary kóp bolǵan. Sondaı-aq, 45 jolaýshy Ispanıa azamaty dep tanylǵan",- dep málimdedi.

Al  ushaq apatyna baılanysty Germanıa kansleri Angela Merkel búginge josparlanǵan barlyq sharalardy keıinge shegergen.

Sonymen qatar, apatqa ushyraǵan A320 aerobýsynyń  izdestirý jumystaryna RF tónenshe jaǵdaılar mınıstrligi aralasýǵa nıet bildirgen.  Qazirdiń ózinde RF  50-ge jýyq  halyqaralyq klasstaǵy,  arnaıy aplpınıstıkaǵa daıyndalǵan,  mamandandyrylǵan qutqarýshylardy jibermekshi.

Al  Dússeldorf áýe jaıyndaǵylar qaza bolǵandar men ushaqta bolǵandardyń naqty sanyn bilmeıtindikterin habarlaǵan.

Apatqa ushyraǵan "Germanwings" áýe kompanıasy  áıgili germanıalyq "Lufthansa" kompanıasyna tıesili bolǵan.  "Lufthansa" kompanıasynyń basqarma tóraǵasy Karsen Shpor ushaq apatyna qatysty málimet berýden bas tartqan. "4U 9525 reısi boıynsha Barselonadan Dússeldorfqa baǵyt alǵan A320 ushaǵyna qatysty naqty aqparat bere almaımyn. Eger bizdiń boljamymyz týra keletin bolsa, bul biz úshin qaraly kún bolmaq. Apattan tiri qalǵandar bar dep úmitteneıik",-dedi Shpor.

Qazirge belgili bolǵandaı ushaqta Fransıa, Ispanıa, Reseı jáne Germanıa azamattary bolǵan.  Apatqa ushyraǵan ushaqtan tiri qalǵandardy izdestirý jumystaryna Germanıa, Fransıa jáne Reseı qutqarýshylary jumyldyrylǵan.

Ázirge nemis jáne reseılik aqparat quraldary apatqa ushyraǵan ushaq sýretin jarıalap otyr.

 Nurgeldi Ábdiǵanıuly