«Ózge memleketterge qaraǵanda, óz elimizde demalý áldeqaıda jaqsy, tıimdi». Mundaı pikirdi Atyraý oblysynyń áleýmettik-ekonomıkalyq damýy máseleleri jónindegi otyrysynda memleket basshysy Nursultan Nazarbaev aıtty. Elbasynyń sóılegen sózinen úzindini KTK arnasynyń jańalyqtar bólimi kórsetti.

«Men álemniń túkpir-túkpirin araladym. Memleketter men elderdiń 251 basshylarymen kezdestim. Endi, olar ózgerdi, al men qaldym, sol sebepti sany osyndaı kóp. Sodan osyndaı qorytyndyǵa keldim, ózge jerden góri óz elimizde demalǵan jaksy», - deı kele prezıdent Aqtaýdaǵy Kaspıı teńizin mysalǵa aldy.

«Bizge tıip turǵan Aqtaýdy alyp qaralyq. Bir kezderi Reseı prezıdenti Vladımır Pýtın teńizge bardy. Sonda bylaı degen edi: «Tyńdashy, mundaı taza, tunyq sýdy kórgen emespin», - dep memleket basshysy estelikterimen bólisti.

Taǵy bir aıta keterligi, sol kúngi kezdesýde Nazarbaev «únemi uıqyda júretin» memlekettik qyzmetkerlerdi de synǵa alǵan. «Bir bólimde 15 adam qyzmet atqarady, terlep-tepship jumys isteıtini úsheý ǵana», - dep ásirese quqyq qorǵaý organdarynyń jumysyna kóńili tolmaıtynyn jetkizdi. Buǵa qosa «polısıa qyzmetkerlerin túgeldeı jumystan bosatyp, zańgerlerdi shaqyrǵan» Grýzıany mysal etti.