Astana qalasyndaǵy atyshýly №2 aýrýhana qazaq tilin qorlaǵandaryn moıyndap, halyqtan da, emdelýshi Muqaǵalı Balqybaevtan de keshirim suraǵanyn jarıaladyq. Muny Qamshy.kz aqparat agenttigine aýrýhanaǵa tikeleı baryp, basshylyqtan keshirim suratqan zańger Jasulan Isa rastaǵan edi. Endi aýrýhana qyzmetkreleri esikter men qabyrǵalar syrtyna qazaq tilinde jazylǵan paraqshalardy jabystyryp, tilge degen qurmetterin arttyra bastaǵan sekildi. Muny emdelýshi Muqaǵalı Balqybaev jibergen myna vıdeo dáleldeıdi. 

Jalpy bolǵan jaǵdaıǵa bir kóz júgirtip ótsek... Muqaǵalıǵa 27 tamyz qulaǵyna operasıa jasatyp, sol kúni keshke «Otolarıngologıa» bólimshesiniń 9-palatasyna jatqyzylǵan. 28 tamyz palataǵa tazalyq saqtaýshy orys áıel kirip, emdelýshilerge oryssha sóıleı bastaıdy. Muqaǵalı óziniń oryssha túsinbeıtinin aıtyp, memlekettik tilde sóıleýin talap etedi. Alaıda áıel qazaq tilinde sóıleı almaıtynyn aıtyp, emdelýshimen sózge kelip qalady. Artynsha palataǵa dáriger Asqat Nıkolaıulyn ertip keledi. «Dárigerim meni qorǵaıtyn shyǵar» dep sengen emdelýshiniń úmiti aqtalmady. Muqaǵalıdiń aıtýynsha, dáriger emdelýshiniń ózine tap bergen. Tipti «qazaqsha sóıle dep qaqsaı berseń, aýrýhanadan shyǵasy, shyǵarý týraly anyqtamany da orys tilinde jazyp beremin» dep «qoqan-loqy» kórsetken kórinedi.

Muqaǵalımen  tildesken biz keıin dárigeri Asqat Nıkolaıulynyń da pikirine qulaq aspaq bolyp, habarlastyq. Emdelýshisine, qala berdi memlekettik tilge arasha túsip, qoldaıyn degen dárigerdi kórmedik. Kerisinshe, «50-den asyp qalǵan tazalyq saqtaýshyǵa qurmetsizdik kórsetti» dep Muqaǵalıdiń ózin aıyptaı bastaǵan edi.

Al búgin janyna bir top jalyndy jastardy jınaǵan Jasulan Isa aýrahanaǵa baryp, basshylyǵymen de, qyzmetkerlerimen de sóılesip, olardyń áreketteriniń durys emestigine kózderin jetkizip keldi.

Zańgerdiń aıtýynsha, №2 qalalyq aýrýhananyń bas dárigeri Ivan Lı, onyń orynbasary, sonymen qatar Muqaǵalıdiń dárigeri Asqat Nıkolaıuly da qatelikterin moıyndap, emdelýshi men halyqtan keshirim surady.