Qazaqstan qarymdy qadam jasap, jańa sıfrlyq dáýirge kirip, el ekonomıkasyna eleýli ózgerister engizip otyrǵany kópshiliktiń nazarynda ekeninin biri bilse, biri bilmeı jatady. Búgingi tańda elektrondy saýdanyń órship turǵan zamanynda «Sıfrlyq Qazaqstan» memlekettik baǵdarlamasynyń da elge bereri mol ekeni kúnnen kúnge aıqyndalyp, dáleldenip kelýde. Baǵdarlama aıasynda elde qarqyndy túrde damyp otyrǵan «Qazposhta» AQ bizdiń ǵana emes sheteldik mamandardyń da nazaryna ilinip otyr. Elordamyz Astana qalasynda Dúnıejúzilik poshta odaǵynyń (DPO) alǵashqy «Sıfrlyq tehnologıalarǵa kóshý jáne Eýropa men Orta Azıa elderinde poshta qyzmetterin ártaraptandyrý» semınary ótti.
Dúnıejúzilik uıym uıymdastyrǵan semınardyń kózdegeni ne boldy? Qazirgi tórtinshi ındýstrıaldyq revolúsıa burynǵydan erekshe. Ol naqty, sıfrlyq jáne bıologıalyq álemderdi baılanystyratyn, barlyq retteýshi sharalarǵa, ekonomıka men ónerkásipke áser etetin tehnologıalarmen sıpattalady.
Osy maqsatta damýshy jáne damyǵan elderdiń arasyndaǵy birqatar salalarda tájirıbe almasý, mamandardyń pikirlerin bilý mańyzdy. Sol sebepti uıymdastyrylǵan semınar álemdik poshta salasyn odan ári damytý men damý baǵytyn anyqtaýǵa arnalǵan bolatyn.
Semınardyń alǵashqy kúninde sıfrlyq ekonomıkany damytýdyń uzaq merzimdi jospary talqylanyp, mamandardyń pikirleri ortaǵa salyndy. Jıynda alǵashqy bolyp «Qazposhta» AQ bıznes bıznes jóndegi basqarýshy dırektory - basqarma múshesi Azat Erkinuly Mashabaev sóz bastap, elimizdegi sıfrlandyrý jaıyna sholý jasady.
Onyń aıtýynsha elektrondy saýdanyń álem ekonomıkasynda orny artyp keledi. Kósh basynda bolý úshin álemdik talaptardan asyp jumys jasaý qajet.
«Qazaqstan Respýblıkasy Dúnıejúzilik poshta odaǵyndaǵy sıfrlandyrýǵa asa mán berip otyrǵan ári ony júzege asyryp otyrǵan memleketterdiń biri. Barshamyz kórip otyrǵandaı qazir saýdanyń kópshiligi ınternet arqyly júzege asyrylady. Mundaı múmkindikter alda turǵanda poshtanyń odan ári damıtyny sózsiz. Elektrondy daǵdylardy meńgerip, búgingi kúngi kóp múmkindikterge ıe bolýdaǵy negizgi sebep elimizde qabyldanǵan «Sıfrlyq Qazaqstan» memlekettik baǵdarlamasy. Baǵdarlama 2018-2022 jyldar aralyǵynda júzege asyrylyp, qoıylǵan maqsattarǵa jetý boıynsha jumystar atqarylyp jatyr. Baǵdarlama tolyqtaı elde ómir súrip jatqan árbir qazaqstandyqtyń ómir súrý deńgeıin jaqsartýǵa baǵyttalǵan. Bul baǵytta Qazposhtanyń da yqpaly áser etýde dep aıtsaq qatelespeıtinimiz anyq. Álem sát saıyn tańǵalarlyq jańalyqtarmen reńin ózgertýde. Qazirde elimizde elektrondyq komersıa naryǵy eki esege artyp otyr. Bizdiń kompanıada 2014 jyldan bastap transformasıalaý baǵdarlamasy iske asyrylyp keledi, soǵan sáıkes kompanıa qyzmetiniń barlyq prosesterin ózgertý josparlanǵan», – dedi Azat Erkinuly.
Sondaı-aq, semınar barysynda sıfrlyq tehnologıalarǵa kóshý jáne poshta qyzmetterin anyqtaý jaıyn DPO Eýropa men Ortalyq Azıa boıynsha aımaqtyq jobasynyń úılestirýshisi jáne sarapshysy Iýrıı Sperıev baıandamasynda kórsetip ótti.
«Dúnıejúzilik poshta odaǵynyń alǵa qoıǵan maqsatyn Stambulda ótken kongreste qabyldanǵan qujattar aıqyndaıdy. 2016 jyly bolǵan kongres bizge poshta jóneltilimderin biryńǵaı poshtalyq keńistikte erkin damytýǵa kepildik beretin telekomýnıkasıalarmen baılanys ornatý úshin elektrondy poshtaǵa negizdelgen tásilderdi anyqtaýǵa kómektesti. Sondaı-aq múddeli elderdiń yntymaqtastyǵyn nasıhattaıtyn zamanaýı tehnologıalardy, biryńǵaı standarttardy qabyldaýdy damytýǵa yqpal etedi. Poshta qyzmetteri bul mindetti bizdiń sıfrlyq dáýirde júzege asyrýǵa múmkindik beredi», – dedi dúnıejúzilik poshta uıymynyń sarapshysy.
Bul yntymaqtastyq jobasynyń basty maqsaty – qatysýshylarǵa jáne olardyń operatorlaryna óz bıznesin transformasıalaý úshin bazalyq jáne bilimdi daǵdylarǵa qatysty praktıkalyq bilimderdi daıyndaýǵa jáne jasaýǵa kómektesý. Poshta operatorlaryna ulttyq jáne aımaqtyq sıfrlyq strategıaǵa sáıkes sıfrlyq ekonomıkaǵa qatysý úshin óz modelderin ázirleýge kómektesý de kiredi. Dúnıejúzilik poshta odaǵy júrgizetin trenıńteri men semınarlary qysqa konsýltasıalyq mısıalarǵa negizdelip, eldegi qaýipsiz ortany damytýǵa baǵyttalǵan.
«Sondaı-aq, joba poshta operatorlarynyń barlyq sıfrlyq ekonomıkadaǵy memlekettik bıznes tutynýshylarynyń qajettilikterine jaýap bere alatyndyǵyn qamtamasyz etedi. Atap aıtqanda, barlyq óńirler boıynsha poshtanyń ınklúzıvti qyzmetterde atqaratyn róliniń mańyzdylyǵyn erekshe atap ótý kerek» – deıdi ekspert.
Atalmysh dóńgelek ústel barysynda «Qazposhta» AQ-nyń sıfrlyq qyzmetteri nazarǵa usynyldy. Onda jalpy elimizdegi Qazposhtanyń atqaryp otyrǵan nátıjeli isteri tanystyryldy. Atap aıtsaq osy kúnge deıin «Qazposhta» AQ arqyly 223 mln. gazetter men hattar, poshta jóneltilimderi men shottar jiberilip, 90,1 mln. qyzmetter kórsetilip, 486 442 tólem kartalary shyǵarylǵan eken. Munan ózge Qazposhta elimizdiń barlyq aımaqtaryn 100 paıyzdyq kórsetkishpen, ıaǵnı 3,5 myńnan astam poshta bólimshelerimen, 22 749 qyzmetkermen qamtyp otyr. El aımaqtarynda eń jańa tehnologıalarmen jabdyqtalǵan 5 sıfrlyq keńseler nátıjeli jumystar atqarýda.
Elimizdegi «Qazposhta» AQ-nyń basty mindeti tutynýshylarǵa poshta, logıstıka, qarjylyq jáne agenttik qyzmetterdi jyldam jáne senimdi alýǵa múmkindik beretin tıimdi ekojúıe negizinde zamanaýı sıfrlyq qoǵamnyń damýyna serpin berý bolyp tabylady.
Jıyn barysynda Dúnıejúzilik poshta odaǵy quramyndaǵy elderden kelgen qatysýshy mamandar tilshilerge óz pikirlerin bildirgen bolatyn.
«Búgingi tańda álemdik ekonomıkanyń ózindik damý úrdisi bar. Qazirde álemdik ekonomıka sıfrlyq tehnologıa negizinde damıdy. Qazaqstan TMD elderinen osy baǵytta damýda kóshbasshy ekendigin eskere otyryp, Qazaqstanda DPO-nyń tarapynan alǵashqy semınar ótkizilýde. Biz barshamyz Qazaqstandy odaqqa múshe el retinde tanyp, ondaǵy poshta salasynyń qandaı qarqynmen damyp otyrǵanyn bilemiz. Baıqaǵanymyzdaı elde kúnnen kúnge poshtanyń bedeli artyp, keremet ister atqarylyp otyr. Bul degenimiz TMD elderi poshtalary úshin de paıdaly úrdis, jaqsy tájirıbe dep aıta alamyn. Tipti eldegi poshta qyzmeti bank salasynyń keı qyzmetterin atqarady. Ásirese Qazposhta qarjylyq qyzmetterdi damytý bóliginde ozyq ta kreatıvti sheshimderimen úzdikter qatarynda. Aldaǵy ýaqytta áli de aýyz toltyrarlyq jańalyqtarymen bólisetinine senemin. Eldiń bolashaǵyn ósiretin Qazaqstan jastaryna sáttilik tileımin», – dep óz oıymen bólisti Ázerbaıjan Respýblıkasynyń Kólik, komýnıkasıalar jáne joǵary tehnologıalar mınıstrligi poshta sektorynyń basshysy Navrýz Mamedov.
Ótkizilgen semınar arqasynda Qazaqstannyń poshta salasyndaǵy jetistikteri men qoldanylyp otyrǵan tehnologıalary sheteldik sarapshylardyń kóńilderinen shyǵyp, joǵary baǵalandy. Shyndyǵynda tájirıbe almasý arqyly sıfrlyq tehnologıalardyń múmkindigin, dárejesin kórsetip, basqa da shet memleketterdiń sıfrlyq daǵdysymen tanysyp, jetistikterin beıimdep qoldanýǵa bolatynyn anyq kórsetti.
