Ár ana óziniń ulyn artyq kóredi. Asyra baǵalaıdy. Biraq ózine júregin ashyp turǵan jaqsynyń qadirin bilmeı, jamandyqqa baratyny nesi? Ulyn artyq kórem dep júrip kelininiń janyn jaralap, óz balasynyń basyndaǵy baǵyn úrkitetini qalaı?..
"Otyńdy óshirme" telehıkaıasy á degennen osyndaı oı týdyrǵan edi.
Sosyn keshegi úshinshi bólimnen telehıkaıanyń oqıǵalary shıelenise bastaǵanyn baıqadyq.
Bir senimsiz shyqqan jeri - ádemi, aqyldy, ıbaly kelin Perızattyń enesiniń ózin "syrtqa teýip", jaqtyrmaı júrgenin, onyń salqyn qabaǵyn qalaı sezbeıdi?
Negizi adam aınalasyndaǵylardyń ózine degen yqylasyn qalaı da sezedi ǵoı. Sýyq yzǵar, jalǵan peıil sezimtal adamnyń jany men júregin qarıdy. Ol tipti tý syrtynda ózine qandaı "úkim shyǵarylyp" jatqanyn sezinedi. Jaqyndary arasynda, óz mańynda bolyp jatqan árbir keleńsiz nárse sezimtal adamnyń júregin tynyshsyzdandyrady emes pe...
Biraq men óz basym Orazkúl Asanǵazyqyzynyń ómiri jaıly jazǵanda keıde jamandyqty elemeý arqyly, baıqamaý arqyly jeńýge bolatynyna kóz jetkizgem. Kúlásh Ahmetovanyń ómir jolyna qarap ta osyǵan uqsas oı túıgen edim. Qandaı da bir jamandyq pen qasiretten aman alyp qalý úshin qudaı aqyndarǵa qıal atty qanat beretinin, sol qanatpen olar kókke kóterilip, jerdegi keıbir alasapyran oqıǵalardan jany men júregin jaralamaı saqtap qala alatynyn túısingendeı bolǵam.
Bálkim, Perızat ta sóıtip júrgen shyǵar...
Biraq ony alda áli qandaı taǵdyr kútip turǵanyn biz bilmeımiz... Áli 17 bólimi bar.
Ne de bolsa qaıshylyqqa toly hıkaıa eken. Oı salmaı qoımaıdy.
Názıra Baıyrbektiń feısbýk paraqshasynan
