Túrmede otyrǵan "Qazatomfrom" kompanıasynyń eks-prezıdenti Muhtar Jákishev anasynyń artynan bir ýys topyraq ta sala almaıtyn boldy dep jazady Qamshy.kz aqparat agenttigi. Búgin tańerteń anasy qaıtys bolýyna baılanysty "Anasynan aıyrylǵan Muhtar Jákishevke bılik bir ýys topyraq salýǵa ruqsat ete me?" degen taqyrypta maqala jarıalap, bıliktiń janashyrlyǵynan úmit kútken edik. Alaıda úkilegen úmitimiz aqtalmady. 

"Qylmystyq-atqarý júıesi komıteti (QAJK) baspasóz qyzmetiniń jetekshisi Ǵalymjan Hasenovtiń habarlaýynsha, Semeı túrmesiniń basshylyǵy Jákishevke anasynyń qaıtys bolǵany jaıly habardy jetkizgen. Kolonıa bastyǵy kóńil aıtqan. Muhtar Jákishev qyrkúıektiń 19-y kúni bolatyn anasynyń jerleý rásimine barýǵa ruqsat surap, ótinish jazǵan. Biraq ótinishi qanaǵattandyrylmaǵan. Onyń sebebin Qylmystyq-atqarý kodeksiniń "Mekemeniń sheginen tys jerge shyǵý" týraly 113-babynyń 5-tarmaǵymen túsindiredi. Onda "qylmystyq top quramynda jasalǵan qylmystarmen sottalǵandarǵa syrtqa shyǵýǵa ruqsat etilmeıdi" dep jazylǵan otandyq BAQ-ta jarıalanǵan habarlamada.