Aqtóbe oblysynda Ózbekstannyń 52 azamaty tirideı janyp ketken avtobýstaǵy órtke jolaýshylar kináli kórinedi. Búgin sotta kinásin moıyndamaǵan júrgizýshisi osylaı dep málimdedi. Ol aman qalǵan Ahrab esimdi kýágerdiń kesirinen ottyń tutanǵanyn aıtady. Bettestirý úshin sony sotqa shaqyrýdy surady dep jazady Qamshy.kz aqparat agenttigi KTK telearnasy deregin negizge alyp.
Túrkistan oblysynan beınebaılanysqa shyqqan jábirlenýshiler sottalýshy Maqsat Pernebekovti suraqtyń astyna aldy. Óıtkeni kólikke jaýapty júrgizýshi – osy. Onyń aıtýynsha, avtobýs qaqaǵan qysta janarmaıy qatyp Yrǵyz aýdanynda turyp qalady. Qutqarýshylarǵa habarlaspastan ózi uıqyǵa ketedi. Tek kólik janyp jatqanda ǵana bir-aq oıanǵan. Al oǵan deıin ózbek jolaýshylar ózara tóbelesken eken. Reseıge jol bastap bara jatqan Ahrab esimdi brıgadırlerine jabylypty. Ol bolsa avtobýstaǵy janarmaı toly bótelkeni teýip qalǵan. Muny tiri qalǵan eki kýágerdiń biri aıtyp beripti. Sol qos kýáger osy ýaqytqa deıin jóndi tergelmegen. Tipti sotqa jaýap alýǵa shaqyrta almaı otyr. Olardyń kýálik etýin sottalýshylar da, jábirlenýshiler de talap etken edi.
Maqsat Pernebekov, sottalýshy:
- Órt dep aıqaılady. Tursam, ot shyǵyp tur. Jaraqat alǵan kúıi qashyp shyqtym. 19-y kúni keshke esimdi jınap suraǵan kezimde tiri qalǵan ózbek azamaty baklajkany Ahrab teýip jiberdi dedi.
