Aıaýly aqyn Ábdirahman Asylbekovten búgin aıyrylyp qaldyq. Ómiriniń sońǵy jyldaryn aqyn kitap jazýǵa arnaǵanyn biri bilse, biri bilmeıdi. Beısenǵalı Esenálıevtiń aıtýynsha, marqum Ábdirahman aqynǵa Alla Taǵala «Qurandy óleń qylyp jaz» dep aıan beripti.

♦Ataqty "Jar-jardyń" sózin jazǵan Ábdirahman Asylbekov ómirden ótti

«Osy kitapty jaryqqa shyǵaryp úlgereıin» degen arman-tilegi de qabyl bolady. Qudaıdyń kózi týra bolyp, toǵyz aı tolǵatyp jazǵan kitaby kóktemde ǵana «Kókjıek» baspahanasynan shyǵyp úlgerdi. Qyrkúıektiń ortasynan bastap atalǵan baspahana Ábdirahman Asylbektiń avtorlyǵymen «Qasıetti Quran – máńgilik murań» degen sý jańa kitapty satylymǵa shyǵardy. Quran Kárimniń aıattaryn óleń túrinde jazyp shyqqan aqynnyń baqılyq bolǵanyn estigen baspahana qyzmetkerleri biz qońyraý shalǵanda abdyrap qaldy. Biz  aqyrǵy kitabynyń jazylý sebebin bilgendikten, avtordyń alǵysózin oqyrman qaýymnyń nazaryna usynyp otyrmyz. «Kókjıek» baspahanasy ótinishimizdi aıaq asty etpeı, marqumǵa óz qurmetin bildire otyryp, kitaptyń sóz basyn redaksıamyzǵa usyndy.

Sózbasy

Bısmıllahır-rahmanır-rahım!

Asa meıirimdi, rahymdy Allanyń atymen bastaımyn.

Meniń bul máseleni qolǵa alýyma túrtki bolǵan nárse – Quran Kárimniń ásem áýezi men qulaqqa qonymdy hám júrekke jaǵymdy qyraǵaty edi. Quran súreleri arab tilinde oqylsa da, saı-súıekti syrqyratyp, óne boıdy shymyrlatyp, erekshe bir sergek sezimge bóleıtini anyq. Degenmen, Quran aıattary tól tilimizdegi aýdarmalardan oqylǵanda dál arab tilindegideı áser ete qoımaıtyndyǵy jasyryn emes. Bálkim, Alla Taǵalanyń tylsymnan tartý etken aıanynyń da áseri shyǵar «Nege Quran aıattaryn tilimizdegi oıly oramdarmen, mánerli maqamdar, ásem áýez, úılesimdi únmen oqylatyndaı óleń túrinde jazyp shyqpasqa?!» degen pikir orala ketti. Aqyrynda, osyndaı eńbekke qajyr-qaırat jumsaýdy jaýapkershiligim dep sanadym da, Allanyń sátin salýymen «bısmıllá» dep bastap kettim. Ardaqty paıǵambarymyz Muhammedti  (sallallahý aláıhı ýá sállám) arab qaýymy paıǵambar retinde moıyndamaı qasarysyp turǵan shaqta Qurannyń áýezdi aıattary bas ıgizip, din qabyldaýlaryna sebep bolǵan edi. Demek, dinimizde negizi bar osyndaı jaqsy dástúr tól tilimizde  jalǵasyn taýyp jatsa, nur ústine nur bolmaq.

Jalpy álemniń ózi bir yrǵaqqa negizdelip, belgili bir áýezdiń besiginde terbelip, esebi dál Qudirettiń qalaýymen qozǵalatyndyǵy belgili. Alla Taǵalanyń jaratylys aıattarynyń mundaı yrǵaǵy bolǵanda, nelikten Quranyndaǵy aıattardyń yrǵaǵy bolmasyn?! Sondyqtan, Quran Kárim aıattary qazaq tilinde de yrǵaǵymen júrekterge jete berse eken degen izgi nıetpen osy isti qolǵa alyp otyrmyz.

Jaýapty da saýapty isti atqarý barysynda jibergen qatelikterimdi keshirýin Alladan jalbaryna surap, musylman qaýymynan kemshilikterim úshin aıyp  etpeýlerin ótinemin.

Osy eńbektiń qazaq halqyna jol tartýyna járdem bergen jaqyndarym men janashyrlaryma qos dúnıeniń ıgiligin tilep, bul eńbektiń saýaby ortaq bolsa eken dep jalbaryna suraımyn.

Demeımin haq Qurannan qıǵash kettim,

Keı sózdi yrǵaq úshin uıqas ettim».

Abdrahman Asylbek