Elordalyq Polısıa departamentiniń krımınaldyq polısıa qyzmetkerleri ınternette alaıaqtyq jasaǵan Taraz qalasynyń turǵyny 23 jastaǵy kúdiktini ustady, dep habarlaıdy Qamshy.kz aqparat agenttigi Astana qalasy ákimdiginiń baspasóz qyzmetine silteme jasap.

Tártip saqshylary anyqtaǵandaı, alaıaq Instagram áleýmettik jelisi arqyly tondar jáne teri buıymdaryn tómen baǵamen satý jáne jetkizý týraly jalǵan aqparatty taratqan. Ol daýysyn tanyp qoımasyn degen oımen «klıenttermen» hat almasýdy tek qana WhatsApp arqyly júrgizipti. Osylaısha, zıankes satyp alýshylardy qyzyqtyryp, tondardyń tapsyrys berýshilerdiń úıine jetkiziletinin aıtyp, Qiwi-koshelek arqyly 100 % tólemdi talap etken.

Krımınaldyq polısıa basqarmasynyń bólim bastyǵy Talǵat Bólegenovtyń aıtýynsha, jábirlenýshiler alaıaqtyń shotyna 100 myńnan 300 myńǵa deıin iri somada aqshalaı qarajattaryn aýdarǵan. Aqshany alǵannan keıin alaıaq nómirlerdi buǵattap, akkaýnttardy joıyp, uıaly telefondaryn sóndirip otyrǵan.

«Osylaısha, jeti azamatty aldaǵan kúdikti 1,5 mıllıon teńge kóleminde paıda kórgen. Qazir ustalǵan adamǵa qatysty sotqa deıingi tergeý amaldary júrgizilýde».

Astana qalasynyń Polısıa departamenti azamattarǵa jáne ınternet arqyly satyp alýshylarǵa tekserilgen ınternet-ónim berýshileriniń qyzmetin ǵana paıdalanýǵa, sondaı-aq taýardy jetkizgennen keıin jáne alǵannan keıin ǵana tólem jasaýǵa keńes beredi.

Osyǵan uqsas faktiler boıynsha jábirlenýshilerdiń sany odan da kóp bolýy múmkin. Sol sebepti polıseıler atalǵan azamatshanyń zańǵa qaıshy áreketterinen zardap shekken jábirlenýshilerge Astana qalasynyń Polısıa departamentine (Beıbitshilik kóshesi, 19) júginýin nemese 8 (7172) 71-62-91, 71-63-35 telefondaryna nemese 102 nómirine qońyraý shalýlaryn suraıdy.