Bul jóninde «Nur Otan» partıasy Tóraǵasynyń Birinshi orynbasary Ortalyq komýnıkasıalar qyzmetinde ótken arnaıy brıfıńte aıtty.

Atalǵan is-sharada Máýlen Áshimbaev Elbasynyń «Uly dalanyń jeti qyry» atty maqalasynda tarıhı sanany jańǵyrtýdyń negizgi basymdyqtaryn aıqyndap bergenin jáne olardy júzege asyrýǵa «Nur Otan» partıasynyń da belsendi qatysatynyn jetkizdi.

– Elbasynyń maqalasyndaı aıtylǵan ıdeıalar men qundylyqtardy dáriptep, júzege asyrýǵa zıaly qaýym ókilderiniń de belsene qatysqany abzal. Sondyqtan «Uly dala» shyǵarmashylyq baıqaýyn jarıalap, qoǵamymyzdyń rýhanı jańǵyrýyna áser etetin eńbekterdi jáne tarıhymyzdaǵy uly tulǵalardyń ónegeli ómirin nasıhattaıtyn shyǵarmalardy qoldap, jańa jumystardyń jazylýyna ózimizdiń úlesimizdi qosýdy kózdep otyrmyz. Baıqaýdyń formaty men mańyzyn Jazýshylar odaǵymen pysyqtap, aldyn ala talqyladyq. Jeńimpazdar bes atalym boıynsha anyqtalady. Olardyń bárine aıtarlyqtaı qarjylaı syılyq taǵaıyndalǵan. Naqty aıtqanda, ár atalymnyń jeńimpazyna – 1,5 mıllıon, 2-oryn ıegerlerine – 750 myń, al 3-oryn alǵan qatysýshylarǵa 500 myń teńgeden beriledi. Sondyqtan bul baıqaýdy jas qalamgerlerge berilgen jańa múmkindik dep qabyldaýǵa da bolady, – dedi Máýlen Áshimbaev.

Baıqaýdyń basty maqsaty – rýhanı jańǵyrý ıdeıalary men qundylyqtaryn dáripteıtin qazirgi zamanǵy qazaqstandyq ádebıetti damytý jáne soǵan qoldaý kórsetý. Sondaı-aq óz shyǵarmalarynda elimizdiń rýhanı jańǵyrýy men damýyn sýretteıtin, qazirgi zamanǵy shyndyqty túsinýge jáne qazaqstandyqtardyń dúnıetanymyn qalyptastyrýǵa yqpal etetin talantty jas ádebıetshilerdi anyqtap, olardyń eńbegine laıyqty baǵa berý de kózdelip otyr.

Baıqaýǵa 18 ben 40 jas aralyǵyndaǵy qalamgerler qatysa alady. Qatysýshylardyń jumystary 2018 jyldyń 28 qarashasy men 2019 jyldyń 15 qańtary aralyǵynda qabyldanady. Nátıjesinde «Proza», «Poezıa», «Dramatýrgıa, kórkem fılmder men teleserıal senarıi», «Pýblısısıka» jáne «Balalarǵa arnalǵan shyǵarma» sıaqty bes birdeı atalym boıynsha jeńimpazdar men júldegerler anyqtalmaq.

Brıfıńke «Nur Otan» partıasy Tóraǵasynyń Birinshi orynbasarymen birge belgili jazýshy, dramatýrg, qoǵam qaıratkeri Tólen Ábdik, pýblısıs, Parlament Májilisiniń depýtaty Saýytbek Abdrahmanov jáne Qazaqstan Jazýshylar odaǵynyń sekretarıat múshesi Nesipbek Aıt qatysty.

Baıqaýdyń basqa da sharttary týraly partıanyń resmı saıtynda jarıalanǵan.